Эронда Ҳўрмуз бўғозидан ўтиш учун тўлов ундириш режаси маъқулланди

Эрон парламентининг хавфсизлик бўйича комиссияси Ҳўрмуз бўғозидан ўтганлик учун кемалардан бож ундирилишини назарда тутувчи режани маъқуллади. Бу ҳақда 30 март куни Эроннинг IRIB давлат телерадиокомпанияси комиссия аъзоларидан бирига таяниб хабар берди.

Режага кўра, бўғоздан АҚШ ёки Исроилга алоқадор кемалар ўта олмайди. Божлар Эрон риёлида олинади.

АҚШ аллақачон Эронга стратегик муҳим аҳамиятга эга бўғоздан ўтганлик учун тўлов ундирилишига йўл қўймаслигини маълум қилди. «[Биз] ҳеч қачон бунга йўл қўймаймиз», – деди АҚШ давлат котиби Марко Рубио ABC учун интервюсида.

Рубио дунёнинг қолган давлатлари буни ҳисобга олиши кераклиги, чунки «Америкага қараганда улар учун кўпроқ нарса хавф остидалиги»ни қўшимча қилган. Давлат департаменти раҳбарининг таъкидлашича, АҚШ Ҳўрмуз бўғози орқали оладиган энергия ресурслари арзимас даражада кам.

28 феврал куни АҚШ ва Исроил Эронга қарши бошлаган урушгача жаҳон бўйлаб ташиладиган нефтнинг 20 фоиз қисми Ҳўрмуз бўғози орқали ўтарди. Эрон уруш бошланиши ортидан бўғозни деярли тўлиқ тўсиб қўйди, бу эса нефт бозорида жиддий тебранишларга олиб келди.

АҚШ президенти Доналд Трамп 22 март куни Эрондан бўғоз орқали ўтишни очишни талаб қилиб, акс ҳолда Эрон электр станциялари ўққа тутилиши билан таҳдид қилди. Икки кун ўтиб, 24 мартда Эрон халқаро ташкилотларни Покистон, Хитой, Россия, Ҳиндистон ва Ироқ каби «душман бўлмаган» давлатларнинг кемалари бўғозни Теҳрон билан келишилган ҳолда кесиб ўтиши мумкинлигини маълум қилди. Трамп эса 10 та кема ўтказилганини айтиб, Эрон электр станцияларига зарба беришни кечиктирди.