Макрон, Мелони, Мерц, Стармер ва бошқалар Эрондаги уруш ҳақида баёнот берди

Европанинг етакчи давлатлари раҳбарлари, Европа Иттифоқи ва Канада раҳбарияти АҚШ ва Эрон ўртасидаги сўнгги келишув юзасидан қўшма баёнот билан чиқди. Хусусан, улар икки ҳафталик сулҳ келишувини олқишлади. Бу ҳақда Европа Кенгаши сайтида эълон қилинган қўшма баёнотда айтилади.

Ушбу баёнотга Франция президенти Эммануэл Макрон, Италия бош вазири Жоржа Мелони, Германия канцлери Фридрих Мерц, Буюк Британия бош вазири Кир Стармер, Канада бош вазири Марк Карни, Дания бош вазири Метте Фредериксен, Нидерландия бош вазири Роб Еттен, Испания бош вазири Педро Санчес, Европа комиссияси президенти Урсула фон дер Ляйен ва Европа Кенгаши президенти Антониу Кошта имзо чеккан.

«Энди мақсад яқин кунларда урушни тез ва узоқ муддатга тўхтатиш бўйича музокаралар бўлиши керак. Бунга фақат дипломатик воситалар ёрдамида эришиш мумкин», дейилади баёнотда.

Шу боис етакчилар музокаралар орқали жиддий тартибга солиш йўлида тез суръатларда боришга чақирмоқда.

«Бу Эрон тинч аҳолисини ҳимоя қилиш ва минтақада хавфсизликни таъминлашда ҳал қилувчи аҳамиятга эга бўлади. Бу жиддий глобал энергия инқирозининг олдини олиши мумкин», дейилади баёнотда.

Шу боис етакчилар тегишли дипломатик саъй-ҳаракатларни қўллаб-қувватламоқда. Улар Қўшма Штатлар ва бошқа ҳамкорлар билан яқин алоқада.

«Биз барча томонларни, жумладан Ливанда ҳам, ўт очишни тўхтатиш режимини жорий этишга чақирамиз», дейилади баёнотда.

Бундан ташқари, етакчилар ўз ҳукуматлари Ҳўрмуз бўғозида кемалар қатнови эркинлигини таъминлашга кўмаклашишини таъкидламоқда.

АҚШ президенти Доналд Трамп 8 апрель куни Покистоннинг Эронга ҳужумларни икки ҳафтага тўхтатиш таклифига рози бўлганини маълум қилди. Оқ уй раҳбарининг таъкидлашича, АҚШ аввалдан қўйган барча ҳарбий мақсадларига «аллақачон эришган ва ҳатто ундан ҳам кўпроғига эришган».

Унинг сўзларига кўра, АҚШ Эрондан 10 банддан иборат таклиф олган ва «бу музокаралар учун асос» деб ҳисоблайди. Трампнинг фикрича, энди икки ҳафталик муддат келишувни охиригача ишлаб чиқиш ва имзолаш имконини беради.