HUMO National AI Hackathon’да ривожланиш стратегиясини тақдим этди

Тадбир давомида давлат ва хусусий секторларда рақамлаштириш ҳамда сунъий интеллект технологияларини жорий этиш бўйича асосий натижалар тақдим этилди. Иштирокчилар ва меҳмонларга “Рақамли ҳукумат” концепцияси доирасидаги илғор ечимлар, шунингдек транспорт, божхона ва солиқ маъмурчилиги, соғлиқни сақлаш, ижтимоий ҳимоя, энергетика, геология, қурилиш ва қишлоқ хўжалиги соҳаларидаги ишланмалар намойиш этилди.

Финтех йўналишининг асосий иштирокчиларидан бири сифатида Ўзбекистоннинг нақдсиз ҳисоб-китоблар миллий инфратузилмасини тақдим этувчи HUMO тўлов тизими қатнашди.

HUMO: миллий тўлов тизими технологик мустақилликнинг асоси ҳисобланади

“МБПМ” АЖ (HUMO) Ўзбекистон Республикаси Президентининг 2018 йил 19 сентябрдаги ПҚ-3945-сон қарорига мувофиқ ташкил этилган. Ўз процессинг марказининг яратилиши мамлакат молиявий барқарорлигини мустаҳкамлаш, технологик мустақилликни таъминлаш, тўлов хизматлари бозорида рақобат муҳитини шакллантириш ҳамда халқаро тўлов тизимларига қарамликни камайтириш йўлида муҳим босқич бўлди.

Миллий инфратузилмани ривожлантиришнинг иқтисодий самараси аллақачон сезиларли даражага етди: фақат 2025 йилда HUMO ечимларидан фойдаланиш орқали мамлакат иқтисодиёти ичида қарийб 600 миллион АҚШ доллари сақлаб қолинди, бу эса бозор иштирокчилари харажатларини камайтириб, ресурсларни миллий ва технологик лойиҳаларни ривожлантиришга йўналтириш имконини берди.

Стратегик йўналиш — ўзбек сўмининг экспансияси ва тўлов усулларини глобал миқёсда ривожлантириш

Марказий Осиё, жумладан, Ўзбекистон бозорларида халқаро тўлов тизимлари фаол кенгаяётган бир пайтда, HUMO мамлакатнинг ўз “молиявий релслари” асосида мустақил тўлов инфратузилмасини шакллантиришга қаратилган ривожланиш стратегиясини амалга оширмоқда.

HUMO’нинг асосий стратегик устувор йўналиши — халқаро бозорда сўмда энг қулай тўлов тизимини яратиш.

Компания Ўзбекистон Республикаси фуқароларига қуйидаги имкониятларни тақдим этувчи ечимларни ривожлантирмоқда:

 * хорижда товар ва хизматлар учун миллий валютада тўлов қилиш;

 * мамлакат ташқарисида ҳам одатий тўлов воситаларидан фойдаланиш;

 * халқаро тўлов тизимларига нисбатан янада қулай шартларга эга бўлиш.

Шу тариқа, HUMO Ўзбекистоннинг ўз “молиявий релслари”ни – иқтисодий самарадорлик, хавфсизлик ва суверенитетни таъминловчи мустақил инфратузилмани шакллантирмоқда.

Халқаро ривожланиш: Марказий Осиёдан глобал майдонга

Мазкур стратегия аллақачон мамлакат ташқарисига чиқмоқда.

Халқаро йўналиш доирасида HUMO Alipay+ билан интеграция орқали дунёнинг 50 дан ортиқ мамлакатида ўзбек сўмида тўловларни амалга ошириш имконини таъминламоқда. Қирғизистон Республикаси, Қозоғистон Республикаси ва Грузия билан ўзаро ҳисоб-китоб лойиҳалари йўлга қўйилган, шунингдек янги ҳамкорлик йўналишлари шакллантирилмоқда. Кейинги босқичда ҳамкорлик географияси кенгайтирилиб, Туркия, БАА, Ҳиндистон, Индонезия, Саудия Арабистони, Сингапур ва Монголияни қамраб олиши режалаштирилган.

Мазкур қадамлар нафақат трансчегаравий тўловларни ривожлантириш, балки Ўзбекистоннинг халқаро молиявий тизимдаги ролини кучайтиришга ҳам хизмат қилади.

Янги тўлов технологиялари ва AI ёндашуви

Рақамли трансформация доирасида HUMO қуйидаги замонавий тўлов ечимларини ривожлантирмоқда:

 * муқобил тўлов усулларини жорий этиш, жумладан, QR-тўловлар

* рақамли молиявий инструментларни ривожлантириш;

 * сунъий интеллект технологияларини молиявий хизматларга интеграция қилиш.

Компания шунингдек, рақамли активлар йўналишида ҳам лойиҳаларни амалга оширмоқда, жумладан, стейблкоинлар чиқариш ва криптокарталарни ривожлантириш орқали анъанавий ва рақамли молиявий воситаларни ягона экотизимга бирлаштирмоқда.

Мамлакат рақамли трансформациясида HUMO’нинг ўрни

HUMO’нинг National AI Hackathon’даги иштироки компаниянинг Ўзбекистон рақамли иқтисодиётини ривожлантиришдаги тизимли ролини акс эттиради.

Бугунги кунда HUMO — бу нафақат тўлов тизими, балки молиявий тизим барқарорлигини таъминловчи, инновацион технологияларни жорий этишни қўллаб-қувватловчи, фойдаланувчилар учун янги тўлов сценарийларини шакллантирувчи ҳамда Ўзбекистоннинг глобал рақамли иқтисодиётга интеграциясига хизмат қилувчи миллий инфратузилманинг муҳим элементи ҳисобланади.

Батафсил:  Sayt | Instagram | Facebook | Telegram | Linkedin