Трамп Ҳўрмуз бўғози очилганига қарамай, Эрон портлари блокадаси сақланиб қолишини айтди

АҚШ президенти Доналд Трамп Теҳрон Ҳўрмуз бўғози тижорат кемалари учун очилганини эълон қилганидан кейин ҳам Эроннинг ҳарбий-денгиз блокадаси ўз кучида қолишини айтди.

«Ҳўрмуз бўғози бизнес ва кемаларнинг эркин ўтиши учун тўлиқ очиқ ва тайёр. Бироқ, Эрон билан келишувимиз 100 фоиз якунланмагунча, унга нисбатан ҳарбий-денгиз қамали ўз кучида қолади», деб ёзди Трамп ўзининг Truth Social ижтимоий тармоғида. Унинг сўзларига кўра, «бу жараён жуда тез ўтиши керак», чунки «аксарият бандлар аллақачон келишилган».

Америка президенти, шунингдек, Эрон АҚШ кўмагида Ҳўрмуз бўғозини ўзининг денгиз миналаридан тозалашни бошлаганини маълум қилди. «Эрон АҚШ ёрдамида барча денгиз миналарини олиб ташламоқда ёки аллақачон олиб ташлаган!», деди Трамп.

17 апрель куни Эрон ташқи ишлар вазири Аббос Ароқчи Исроил ва Ливан «Ҳизбуллоҳ» ўртасидаги ўт очишни тўхтатиш режимининг қолган муддати учун Ҳўрмуз бўғози барча тижорат кемалари учун очилганини маълум қилди. Шу билан бирга, Tasnim агентлигининг Эрон Хавфсизлик кенгашидаги манбасининг таъкидлашича, бўғоздан ўтаётган кемалар ҳам, уларнинг юклари ҳам АҚШ ва Исроил билан боғлиқ бўлмаслиги керак.

Февраль ойи охирида АҚШ ва Исроилнинг Эронга қарши ҳарбий операцияси бошланганидан бери Теҳрон Ҳўрмуз бўғози ёпилганини эълон қилди.

Трамп бўғознинг зудлик билан очилишини талаб қилди, рад жавобидан сўнг эса АҚШ Эрон портлари ва қирғоқ чизиғига нисбатан блокада жорий этди.