Бразилия миллий жамоасининг жаҳон чемпионатидаги йўли 1/8 финалда Норвегиядан учралган мағлубият (1:2) билан якунланди. Ўйиндан кейин 34 ёшли Неймар скандинавларга қарши кечган ўйин унинг миллий жамоа сафидаги сўнгги ўйини бўлиб қолишини маълум қилди.

Сўнгги гол ва кўз ёшлар

Норвегия билан ўйинда Неймар 67-дақиқада захирадан майдонга туширилди. Кўп ўтмай унинг жамоаси Эрлинг Ҳоланддан кетма-кет голлар ўтказиб юборди, аммо ўйинга сўнгги нуқтани қўшимча дақиқаларда пеналтини аниқ ижро этган бразилиялик ҳужумчи қўйди. Карло Анчелотти шогирдларида ҳисобни тенглаштириш учун вақт қолмаганди ва пентакампеонлар 1990 йилдан буён илк бор жаҳон чемпионатида чоракфиналга ҳам етиб бора олмади.

Ўйин якунлангани ҳақидаги ҳуштак чалинганидан кейин Неймар газонга ўтирди ва йиғлаб юборди. Унинг олдига Рафиня етиб келди ва юпата бошлади.

У нега бу қадар қаттиқ хафа бўлгани сабаби тезда маълум бўлди. Журналистлар билан мулоқотда у Бразилия миллий жамоаси сафидаги фаолиятини якунлаганини эълон қилди.

«Мен қайта ва қайта ҳаракат қилдим. Аммо энди барчаси тугади. Мен шу ерда бошлагандим, шу ерда якунлайман», – дея унинг сўзларини келтирган Globo.

Йирик совринларсиз

Неймарнинг миллий жамоадаги карьераси 2010 йил ЖАР майдонларида бўлиб ўтган жаҳон чемпионатида бошланиши мумкин эди: ўшанда Пеле ҳам ўша вақтда миллий жамоа бош мураббийи бўлган Дунгадан 18 ёшли ушбу футболчини асосий жамоага чақиришни талаб қилган, аммо футболчи якуний қайдномадан ўрин олмаганди. Мураббий буни футболчи ҳали жуда ёшлиги билан изоҳлаганди.

У фақат ўша йил августида АҚШга қарши ўйинда (2:0) миллий жамоа сафида дебют қилади ва дарҳол ўз голлари ҳисобини очади. Бразилиядаги жаҳон чемпионатига эса у суперюлдуз мақомида етиб келади. Қолаверса, 2013 йил Неймар Бразилия билан Конфедерациялар кубогини қўлга киритади.

Аммо уйдаги мундиал пентакампеонлар учун яримфиналда Германиядан учралган даҳшатли мағлубият (1:7) билан якунланади. Неймар ўша ўйинни жароҳат туфайли ўтказиб юборганди. Чоракфиналда Колумбияга қарши кечган ўйинда (2:1) Хуан Сунига билан тўқнашувдан кейин Неймарга бел умуртқаси синиши ташхиси қўйилганди

2018 йилда ҳам, 2022 йилда ҳам Бразилия жаҳон чемпионатидаги иштирокини чоракфиналда тўхтатади. Россиядаги мундиалда бразиллар Белгияга (2:1), Қатарда – Хорватияга (1:1, пеналтилар сериясида 2:4) ютқазган.