Оқ уй президент Трампни «қирол» деб атади

Оқ уйнинг ижтимоий тармоқдаги расмий аккаунтида АҚШга ташриф буюрган Буюк Британия қироли Чарлз III ва президент Доналд Трамп ўртасидаги учрашув сурати «Икки қирол» сўзлари билан эълон қилинди.

Чарлз III ва қиролича Камилланинг расмий саломлашуви пайтида олинган ва «Икки қирол» деб номланган суратда президент Трамп ва Чарлз III Оқ уй олдидаги майсазорда кулиб турибди.

Reuters нашрига кўра, бу Трампнинг иккинчи президентлик муддати давомида монархия рамзлари билан ўйнашган биринчи ҳолат эмас.

2025 йил октябрь ойида у сунъий интеллект томонидан яратилган видеони эълон қилди. Трамп унда ўз маъмуриятига қарши «Йўқолсин қироллар» шиори остида ўтказилган намойиш иштирокчилари устидан учиб ўтаётган қирувчи самолётнинг штурвалида тож кийган ҳолда тасвирланган. Конгрессдаги республикачилар етакчилари бу намойишларни мунтазам равишда «Америкага нафрат» митинглари деб атайди. Парвознинг ўртасида Трамп йиғилганлар устига ахлат тўкади.

Сунъий интеллект ёрдамида яратилган яна бир видеода у тож, қироллик либоси ва қилич билан тасвирланган, демократ конгрессменлар эса унинг қаршисида тиз чўкади.

Яқинда Трамп ўзини Исо Масиҳ қиёфасида акс эттирган суратни эълон қилди, бироқ ҳатто тарафдорлари ҳам уни танқид қилганидан сўнг, суратни ўчириб ташлади.

Шу билан бирга, Трамп бошқарувининг сўнгги йилида Қўшма Штатларда «Йўқолсин қироллар» шиори остида мунтазам равишда кенг кўламли намойишлар бўлиб ўтмоқда, бу мамлакат тарихидаги энг оммавий норозилик намойишларидан бирига айланди. Сўнгги оммавий акциялар март ойининг охири ва апрел ойи бошида бўлиб ўтди ва мамлакатнинг деярли барча 50 штатини қамраб олди. Намойишчилар «Йўқолсин қироллар» шиоридан ташқари, «Авторитаризмдан демократияга қайтиш», «Йўқолсин Трамп», «Йўқолсин Миграция хизмати», «Эрон билан уруш тўхтатилсин» шиорлари ёзилган плакатларни кўтарди.