Хитой 78 миллиард туп дарахт экди, аммо энди бунинг салбий оқибатларини кўрмоқда

Хитой тарихдаги энг йирик экологик лойиҳалардан бирини амалга оширди ва Жазоир катталигидаги ҳудудга дарахт экди, деб хабар берди Wirtualna Polska.

1980-йиллардан бери унинг ҳудудида 78 миллиардга яқин янги дарахтлар пайдо бўлди. Бироқ Тянжин, Утрехт ва Хитой қишлоқ хўжалиги университетлари олимларининг таҳлили шуни кўрсатадики, «Буюк яшил девор» жиддий ножўя таъсирларни келтириб чиқарган.

Тадқиқотчиларнинг фикрича, оммавий кўкаламзорлаштириш мамлакат ҳудудининг 74 фоизини эгаллаган шарқий ва шимоли-ғарбий ҳудудларда сув ресурсларининг кескин камайишига олиб келди.

Тадқиқот муаллифларининг таъкидлашича, янги ўрмонлар эвапотранспирация жараёнини кучайтирган - бу тупроқдан сувнинг буғланиши ва ўсимликлар томонидан унинг ажралиб чиқиши комбинациясидир. Оқибатда, намлик Тибет платосига кўчди ва аҳоли зич жойлашган Шарқий Хитойда сув танқислигига олиб келди. Масалан, ўтлоқларнинг ўрмонга айланиши «буғланиш ва ёғингарчиликни кўпайтирди, лекин шу билан бирга сув мувозанатини ёмонлаштиради».

Маълумотларга кўра, Хитойнинг шимолида аҳолининг 46 фоизи, аммо сув захираларининг атиги 20 фоизи тўпланганлиги сабабли муаммо янада кескинлашмоқда.

Олимларнинг хулосаларида таъкидланишича, «Хитойда ўрмонларни қайта тиклашнинг кейинги дастурлари бутун минтақаларни ичимлик суви ва қишлоқ хўжалиги ресурсларидан маҳрум қилмаслик учун гидрологик циклнинг ўзгаришини ҳисобга олиши керак».