Биринчи АЭС қурилишига старт ва абитуриентлар қабулининг бошланиши — маҳаллий дайжест

Шавкат Мирзиёев ва Владимир Путин Ўзбекистонда интеграциялашган атом электр станциясининг биринчи энергия блокини қуриш жараёнига расман старт берди. 2026-2027 ўқув йили учун давлат олий ва касбий таълим муассасаларига қабул жараёни бошланди. 1 сентябрдан қурилиш соҳасидаги бир қатор давлат хизматлари бирлаштирилиб, ягона давлат хизмати — архитектура ва шаҳарсозлик талабини бериш тизими жорий этилади. Ўзбекистоннинг тўртта вилоятида Жанубий Кореяга ишга юбориш эвазига фуқароларнинг пул маблағларини фирибгарлик йўли билан қўлга киритган шахслар ушланди. Куннинг муҳим янгиликлари билан таништирамиз.

Биринчи АЭС энергия блоки қурилишига старт берилди

Ўзбекистон президенти Шавкат Мирзиёев ва Россия президенти Владимир Путин мамлакатда интеграциялашган атом электр станциясининг биринчи энергия блокини қуриш жараёнига расман старт берди.

Санкт-Петербург шаҳрида бўлиб ўтган маросимда телекўприк орқали Халқаро атом энергияси агентлиги бош директори Рафаэл Гросси ҳам иштирок этди.

Биринчи АЭС Жиззах вилоятида қурилмоқда. Қайд этилишича, атом электр станцияси қурилиши Ўзбекистоннинг технологик, саноат ва илмий тараққиётида янги босқични бошлаб беради. Лойиҳа мамлакатда атом энергетикаси соҳасини шакллантириш ва ривожлантириш учун мустаҳкам асос яратади. Лойиҳа кичик модулли атом генерацияси ҳамда йирик ҳажмли энергетика соҳасидаги замонавий технологияларни ўзида мужассам этгани таъкидланди.

Абитуриентлар қабули бошланди

2026-2027 ўқув йили учун давлат олий ва касбий таълим муассасаларига қабул жараёни бошланди. Абитуриентлар 25 июнга қадар тест синовларида иштирок этиш учун онлайн рўйхатдан ўтиши мумкин.

Бакалавриатига қабул жараёни икки босқичда — «аввал тест, сўнг танлов» тамойили асосида амалга оширилади. Биринчи босқичда абитуриентлар 5 июндан 25 июнгача Билимни баҳолаш агентлигининг расмий сайти орқали онлайн рўйхатдан ўтади. Рўйхатдан ўтиш жараёнида фанлар мажмуаси, таълим тили ва тест топшириш ҳудуди танланади.

Тест натижалари имтиҳон топширилган куннинг эртасига эълон қилинади. Талабаликка тавсия этилганлар рўйхати эса қабул жараёнининг иккинчи босқичи тугалланганидан кейин бир ҳафта ичида маълум қилинади.

Қурилишга рухсат олиш жараёни соддалаштирилади

1 сентябрдан бошлаб республика бўйлаб қурилиш соҳасидаги бир қатор давлат хизматлари бирлаштирилиб, ягона давлат хизмати — архитектура ва шаҳарсозлик талабини бериш тизими жорий этилади. Бу ҳақда президентнинг фармони имзоланди.

Шунингдек, 2026 йил 1 июлдан объектларни муҳандислик-коммуникация тармоқларига улаш жараёни «1 та ариза – 1 тўлов – барча уланиш нуқталари» тамойили асосида амалга оширилади.

Бундан ташқари, давлат хизматлари жараёнида аниқланган камчиликларни бартараф этиш учун тадбиркорларга қўшимча беш иш куни берилади.

Жанубий Кореяга ишга юбориш эвазига одамлардан минглаб доллар олган шахслар ушланди

Ўзбекистоннинг тўртта вилоятида фуқароларни Жанубий Кореяга ишга ва ўқишга юборишни ваъда қилиб, уларнинг пул маблағларини фирибгарлик йўли билан қўлга киритган шахслар аниқланди.

Хусусан, Андижон вилоятида «N.K.» нодавлат таълим муассасаси раҳбари С.Э. 15 нафар фуқаронинг 50 минг доллардан ортиқ маблағни фирибгарлик йўли билан қўлга киритгани аниқланган.

Бухоро вилоятида Н.Ж. Миграция агентлигида ишловчи танишлари орқали фуқарони Жанубий Кореяга юборишини айтиб, 7 минг доллар олган вақтида қўлга тушган. Наманган вилоятида «G.V.» МЧЖ раҳбари 11 минг долларни, Сурхондарё вилоятида Ф.Р. 5 минг доллар ва 61 млн сўмни фирибгарлик йўли билан олган вақтида ашёвий далиллар билан ушланган.