Тўрт боланинг “бошини еган” электромопедми ёки?.. - Пахтачидаги фожиа тафсилотлари

Самарқанд вилоятининг Пахтачи туманида содир бўлган фожиа тўрт нафар боланинг умрига зомин бўлди. Юк ташиш учун мўлжалланган электромопедда сайрга чиққан оила аъзолари ва болалар Нарпай каналига тушиб кетган. Саккиз кишидан тўрт нафари қутқариб қолинган бўлса, яна тўрт нафар вояга етмаган бола ҳалок бўлган.

Kun.uz мухбири воқеа жойида бўлиб, гувоҳлар ва болаларни қутқаришга ҳаракат қилган инсонлар билан суҳбатлашди.

Фавқулодда вазиятлар вазирлиги маълумотига кўра, 31 май куни соат 20:25 да тумандаги Украш маҳалласи ҳудудидан оқиб ўтувчи Нарпай каналига электромопед тушиб кетгани ҳақида хабар келиб тушган.

Суриштирувлар давомида аниқланишича, 1984 йилда туғилган фуқаро ўз бошқарувидаги электромопедга турмуш ўртоғи ҳамда олти нафар вояга етмаган болани миндирган ҳолда сайр қилаётган бўлган. Йўл давомида ҳайдовчи бошқарувни йўқотган ва транспорт воситаси каналга тушиб кетган.

Ҳодиса жойига етиб келган қутқарувчилар каналга тушиб кетган саккиз кишидан тўрт нафари маҳаллий аҳоли томонидан қутқариб қолинганини аниқлаган. Қолган тўрт нафар бола эса сувда олиб борилган қидирув ишлари давомида топилган.

«Бир қизчани сочидан ушлаб чиқариб олдим»

Ҳодисани биринчи бўлиб кўрган Носир Кенжаев фермер хўжалигида ишлаётган пайтида канал томондан ёрдам чақириқларини эшитган. У электромопед сувга тушаётганини узоқдан кўриб қолган.

«Дамбага яқинлашганимда бир қизча сувда айланаётган экан. Ҳушидан кетиш арафасида эди. Сочидан ушлаб, кейин қўлидан тортиб чиқариб олдим», дейди Кенжаев.

Қутқарилган қизча эса сувда қолиб кетган укаси ва қариндошларини қутқариш учун яна каналга тушишга уринган.

«Укамлар бор, мени қўйиб юборинг», деб йиғларди. Уни одамларга топшириб, яна бошқаларни қутқаришга ҳаракат қилдик», дейди суҳбатдошимиз.

Каналга яқин ҳудудда истиқомат қилувчи Нурмамат Сафаров ҳам яна бир болани қутқариб қолган.

Маҳаллий аҳоли ва ёшлар ҳодисадан кейин бир неча соат давомида канал бўйлаб қидирув ишларида иштирок этган. Айримлар тун ярмигача, айримлар эса эрталабга қадар сув бўйида қолган.

Канал ёқасида хавф сақланиб қолмоқда

Ҳодиса содир бўлган ҳудудда канал билан автомобил йўли деярли ёнма-ён жойлашганига гувоҳ бўлдик. Канал қирғоғи жуда сирпанчиқ. Энг муҳими, канал билан йўл ўртасида ҳеч қандай ҳимоя тўсиғи мавжуд эмас.

Бу эса нафақат электромопед, ҳар қандай транспорт воситаси учун ҳам хавф туғдиради. Айниқса, тунги вақтда ёритиш тизими етарли бўлмаган шароитда бундай нуқталар фожиа хавфини янада оширади.

Албатта, мазкур ҳолатнинг асосий сабаби ҳали расман эълон қилинмаган. Тергов ҳаракатлари давом этмоқда. Бироқ воқеа жойидаги шароит хавфсизлик инфратузилмаси масаласини ҳам кун тартибига чиқаради.

Сўнгги йилларда Ўзбекистонга юк ташиш учун мўлжалланган электр мопедлар, мотороллерлар ва турли енгил мототранспорт воситалари кўплаб кириб келмоқда. Айниқса, қишлоқ жойларда улар аҳоли учун арзон ва қулай транспорт сифатида оммалашди.

Бу техникалар деҳқончиликда, хўжалик ишларида ва кичик юк ташишда инсон меҳнатини енгиллаштирмоқда. Муаммо техниканинг ўзида эмас, ундан қандай фойдаланилаётганида.

Айнан Пахтачидаги фожиа замонавий ва қулай техникадан тўғри фойдаланилмаса, у енгиллик эмас, оғир оқибатларга сабаб бўлиши мумкинлигини кўрсатди.