Janubiy Koreyadan O‘zbekistonga yurak jarrohlari tashrif buyurdi

Janubiy Koreyadagi Pundan Cha shifoxonasining yurak jarrohlari va Junior Chamber International - JCI-Korea xalqaro tashkiloti vakillaridan iborat delegatsiya O‘zbekistonga tashrif buyurdi. Ma'lum bo‘lishicha, 12 kishilik ushbu delegatsiyaning Toshkentga tashrifi JCI-Korea tashkilotining “Sog‘lom avlod uchun” jamg‘armasi bilan hamkorligi doirasida tashkil etilgan.

Koreyalik shifokorlar O‘zbekistonda 19-23 may kunlari bo‘lib, bir qator tadbirlarda ishtirok etadi. Jumladan, ular “Sog‘lom avlod uchun” jamg‘armasida uchrashuvlar o‘tkazadi, yurak xastaligiga chalingan bolalarni tibbiy ko‘rikdan o‘tkazadi, Kim Pen Xva nomidagi muzeyga, Arirang pansionati, Toshkentdagi koreys ta'lim markazi, O‘zbekistondagi Koreya madaniy markazlari uyushmasi, Sejong nomli koreys maktablari va Koreya elchixonasiga tashrif buyuradi. Bundan tashqari, ular loyiha doirasida jarrohlik amaliyotidan o‘tgan bolalar bilan uchrashadi.

20 may kuni koreyalik jarrohlar xasta bolalarni tibbiy ko‘rikdan o‘tkazadi. Keyinchalik yosh bemorlardan ba'zi birovlari Koreyaga olib ketilib, JCI-Korea tashkilotining moliyaviy ko‘magida Cha universiteti qoshidagi Pundan Cha shifoxonasida davolanadi yoki jarrohlik amaliyotidan o‘tkaziladi.