“Blyuz qiroli” Bi Bi King 30 may kuni Missisipi shtatida dafn etiladi

Amerikalik afsonaviy blyuz yo‘nalishida ijod qilgan musiqachi Bi Bi King tug‘ilib o‘sgan va o‘z faoliyatini boshlagan ona shtati Missisipida 30 may kuni dafn etiladigan bo‘ldi. Bu haqda “TASS” axborot agentligi xabar bermoqda.

Marhumning jasadi Tennessi shtatining Memfis shahriga olib kelinadi. U yerda vidolashuv marosimi va musiqachining xotira kuni bo‘lib o‘tadi. So‘ngra marhum Missisipi shtatining Indianola shahriga olib kelinadi. Bi Bi King aynan shu shaharda tug‘ilib, voyaga yetgan. 29 mayda bu yerda ham vidolashuv marosimi bo‘lib o‘tadi, ertasiga – 30 may kuni musiqachi Bell Grove cherkovi yonidagi qabristonga dafn etiladi.

Ma'lumot uchun, “blyuz qiroli” Bi Bi King 14 may kuni, Las-Vegasdagi uyida 89 yoshida uzoq davom etgan kasallikdan so‘ng vafot etdi. Bi Bi King son-sanoqsiz mukofotlar, shu jumladan bir nechta Gremmi mukofoti sovrindori hisoblanadi. Gitarachi va xonanda o‘zining mashhurligiga bamaylixotir qarardi: “Dunyoda ko‘plab men qilolmaydigan narsalar bor. Menda faqat bitta narsa yaxshi chiqadi – Bi Bi King bo‘lish”, deb aytgan edi “blyuz qiroli” o‘z intervyularidan birida.