AQSh prezidenti lavozimiga nomzod ciyosatchi 11 soat davomida nutq so‘zladi

AQSh prezidenti lavozimiga nomzod, respublikachi Rend Pol 11 soat davomida Kongressning yuqori palatasi – senatda Vatanparvarlik aktining amal qilishini uzaytirishga qarshi nutq so‘zladi.

Ushbu federal qonun 2001 yilning 11 sentabridagi terrorchilik hujumlaridan keyin qabul qilingan edi. Qonun hukumatga fuqarolarni nazorat qilish, xususan telefon suhbatlarni tinglash va elektron pochtalarni nazorat qilish bo‘yicha keng vakolatlar beradi. Kongress bu qonunning amal qilishini uzaytirish masalasini 1 iyungacha ko‘rib chiqishi kerak. Aynan shu kuni uning amal qilishi muddati tugaydi.

“Xalqlar tarixida qo‘rquv va beparvolik hukumatga qo‘shimcha vakolatlar beradigan vaqtlar kelmoqda, bunda erkinlar va shaxsiy hayotga tegishli huquqlar aziyat chekmoqda”, deb aytdi mahalliy vaqt bilan 13:20 da nutqini boshlagan Kentukki shtatidan vakolatlik qiluvchi senator.

Rend Pol bunga chek qo‘yish vaqti kelganini va u Vanatparvarlik akti qayta ko‘rib chiqilmagan holda yana qabul qilinishiga yo‘l qo‘ymasligini ta'kidlab o‘tdi.

Pol o‘z nutqini soat 23:50 da tugatgan. Qayd etish joizki, u nutqi paytida biror marta ham o‘tirmagan.

Biroq u senator Strom Termond (Janubiy Karolina) o‘rnatgan rekorddan o‘ta olmadi. 1957 yilda Termond turli amerikalik guruhlar o‘rtasida tenghuquqlik va saylov huquqlariga tegishli bo‘lgan qonun loyihasining qabul qilinishiga yo‘l qo‘ymaslik maqsadida 24 soat davomida nutq so‘zlagan. Keyingi davrdagi siyosiy yetakchilari orasida nutqining davomiyligi bo‘yicha 2013 yilda vafot etgan Venesuelaning sobiq prezidenti Ugo Chaves rekordchi hisoblanadi. U 2012 yilda deyarli 11 soatdan ortiqroq vaqt davomida Milliy assambleya deputatlariga yil yakunlari bo‘yicha hisobot bergandi.

Rend Pol prezident lavozimiga kurashishi haqida 7 aprelda e'lon qilgan edi.

AQShda prezidentlik saylovlari 2016 yilning 8 noyabrida bo‘lib o‘tadi. Florida va Texasdan vakolatlik qiluvchi respublikachi-senatorlar Marko Rubio va Ted Kruz, Arkanzasning sobiq gubernatori, respublikachi Mayk Xakabi, shuningdek, AQShning sobiq davlat kotibi Hillari Klinton prezidentlik saylovi poygasida ishtirok etishlari haqida ma'lum qilishgan.