25 mayda Buyuk Britaniyada “pishloq poygalari” bo‘lib o‘tadi

Bugun, 25 mayda Buyuk Britaniyaning Glostershir grafligida an'anaviy Kupersxild pishloq poygasi bo‘lib o‘tadi. Har yili o‘tkaziladigan ushbu an'anaviy poyga 200 yildan beri may oyining oxirgi dushanbasida o‘tkazib kelinmoqda.

200 metrlik Kuper qiyaligidan mahalliy Gloster navidagi 4 kg lik pishloq dumalatib yuboriladi. Uning orqasidan ob-havoga qanday bo‘lishiga qaramasdan poyga ishtirokchilari quvlashni boshlashadi. Pishloqning ketidan quvlash paytida poyganing oxirigacha oyoqda turishning deyarli iloji yo‘q. Pishloqning tezligi ba'zida soatiga 100 km gacha yetadi.
Ushbu poygalar sog‘liq uchun jiddiy xavf solishi mumkin: ishtirokchilar poyga davomida qo‘l-oyoqlari, qovurg‘alarini sindirib olish va boshqa jarohatlar olishlari hollari ko‘plab uchragan. Ba'zida tomoshabinlar ham jarohat oladilar.

Shuning uchun oxirgi vaqtlarda politsiya ushbu poygalarni taqiqlab qo‘yishga urinmoqda.

Bu udum qayerdan paydo bo‘lganini hech kim aniq bilmaydi. Udum qishdan keyin yangi yilning kelganining timsoli sifatida tog‘dan yonayotgan shox-shabbalar bog‘lamini dumalatish an'anasiga borib taqaladi, degan fikrlar ham bor.