Ahmad Qodirov nomli jamg‘arma Xitoydagi rus qabristonini tiklashga yordam beradi

Rossiya qahramoni Ahmad Qodirov nomli mintaqaviy jamg‘arma Xitoyning Lyaonin viloyatidagi Dalyan shahrida joylashgan Tsinyuntsze rus qabristonini tiklashga moliyaviy ko‘mak ko‘rsatadi. Bu haqda XXRda istiqomat qiluvchi rus diasporasining 9-konferensiyasi chog‘ida Dalyandagi birlashma rahbari Aleksey Andryunin bayonot berdi.

“Dalyanning markaziy Tsinyuntsze ko‘chasida joylashgan rus qabristoni ta'mirtalab bo‘lib qolgan. Biz u yerda tez-tez hashar o‘tkazib turamiz, lekin kuchlarimiz kamlik qilmoqda. Qabristonni va u yerdagi ibodatxonani tiklash uchun moddiy yordamga muhtojmiz. Bizning birlashmamiz bir necha yildan buyon homiy qidirish bilan band, yaqinda Rossiya qahramoni Ahmad Qodirov nomli mintaqaviy jamg‘armadan ijobiy javob oldik. Ular barcha ta'mir ishlarini moliyalashtirishga va'da berdi”, – uning so‘zlarini keltiradi TASS agentligi.

Dalyandagi rus fuqarolik qabristonida rus-yapon urushi yillarida (1904-1905) rus askarlari ham ko‘milgan. Shu bois u qisman harbiy qabriston ham hisoblanadi. Bundan tashqari, 1945 yillarda u yerda sovet askarlari ko‘milgan.