Suriyadan MDH va Rossiyaning 80 nafar fuqarosi evakuatsiya qilindi

Rossiya Favqulodda vaziyatlar vazirligiga tegishli Il-76 rusumli samolyot orqali Suriyadan Rossiya va MDH davlatlari fuqaroligiga ega bo‘lgan kishilar evakuatsiya qilindi. Bu haqda Rossiya FVV matbuot xizmatiga asoslangan holda TASS nashri xabar bergan.

"Il-76 samolyoti Suriyaning Latakiya shahridan Moskva vaqti bilan 28 may kuni soat 19:05da bortida 80 kishi bilan havoga ko‘tarildi. Samolyotdagi yo‘lovchilarning 66 nafari Rossiya, 7 nafari Belarus, 4 nafari Ukraina va 3 nafari O‘zbekiston fuqarolari hisoblanadi", deyiladi xabarda.

Yo‘lovchilarning 34 nafari bolalar ekani aytilmoqda.

Samolyot Domodedovo aeroportiga qo‘ngan.

Biroz oldinroq, Il-76 samolyoti Latakiyaga 21,5 tonni insonparvarlik yordami olib borgani haqida xabar qilingandi.

Ushbu ishlar Rossiya va Suriya hukumatlari kelishuvi asosida amalga oshirilmoqda.

Qayd etish joizki, oxirgi yil davomida Rossiya tomonidan Suriyaga jami 530 tonnadan ortiq oziq-ovqat hamda tibbiy vositalarni o‘z ichiga olgan insonparvarlik yordamlari yetkazib berilgan. O‘z navbatida rus samolyotlari mamlakat hududidan Rossiya va boshqa MDH davlatlari fuqarolari bo‘lgan 1,1 ming nafardan ortiq kishini evakuatsiya qilgan.