O‘zbekistonda elektr energiyasi samaradorligi ikki barobarga o‘sdi

2000 yildan buyon O‘zbekiston yalpi ichki mahsulotining energetik samaradorligi ko‘rsatkichlari ikki barobarga o‘sdi, deb xabar bermoqda "Gazeta.Uz". Bu haqda “Energiya samardorligi – iqtisodiyotni yanada rivojlantirishdagi bosh omil” mavzuida o‘tkazilgan konferensiya chog‘ida bayonot berildi.
Tadbir iqtisodiyot vazirligi va Jahon banki vakolatxonasi tomonidan tashkil etildi.
“O‘zbekiston YaIM energiya samaradorligi 2000 yildan buyon neft ekvivalentida 0.98 tonnadan 0.48 tonnaga oshdi, va bu tendensiya yanada rivojlanib borish salohiyatiga ega”, – deyiladi vazirlik materiallarida.
Ayni paytda mamlakatda sanoatda energiya samaradorligini oshirish dasturi amalga oshirilmoqda. Loyihani moliyalashtirish uchun 125 mln dollar miqdordagi mablag‘ Jahon banki tomonidan ajratildi. Sohadagi investitsiyalar energetik tizimlarni va sanoat uskunalarini almashtirish va modernizatsiya qilish, isitish uchun ikkilamchi issiqlikni qo‘llash, muqobil energiya manbalarini rivojlantirishga yo‘naltirilmoqda.