O‘zbekiston The Rule of Law Index xalqaro reytingida 81-o‘rinni egalladi

World Justice Project xalqaro nohukumat tashkiloti 2015 yilgi qonun ustuvorligi indeksini e'lon qildi (The Rule of Law Index 2015).
Reytingdan joy olgan 102 mamlakat sakkiz kriteriy bo‘yicha baholandi: hokimiyat institutlari vakolatlarining cheklanishi, korrupsiya darajasi, tartib va xavfsizlik, asosiy huquqlar himoyasi, hokimiyat institutlari faoliyatining shaffofligi, qonunlarga rioya qilinishi, fuqarolik sudi, jinoiy sud.
Reytingning yetakchilari Daniya, Norvegiya, Shvetsiya, Finlyandiya va Niderlandiya bo‘ldi. Shuningdek, kuchli o‘nlikka Yangi Zelandiya, Avstriya, Germaniya, Singapur va Avstraliya kirdi.
Ro‘yxat oxiridan o‘rin olgan mamlakatlar Zimbabve, Afg‘oniston va Venesuela bo‘ldi.
O‘zbekiston joriy ro‘yxatda 81-o‘ringa munosib ko‘rildi. O‘tgan yili u 73-o‘ringa qo‘yilgan edi.
Qozog‘iston 65, Ukraina 70, Xitoy 71, Qirg‘iziston 74, Rossiya 75-o‘ringa qo‘yildi. Tojikiston va Turkmaniston ro‘yxatga kiritilmadi.
Qonun ustuvorligi indeksi 2010 yilda ishlab chiqilgan bo‘lib, adolat va qonuniylikning universal prinsiplar asosiga quriladi.