10 iyun kuni Samarqand viloyatida ulamolar va keng jamoatchilik vakillari ishtirokida “Ijtimoiy barqarorlikni yanada mustahkamlash, muqaddas dinimizning sofligini asrash – davr talabi” mavzuida respublika anjumani bo‘lib o‘tdi. Unga respublikaning barcha viloyatlari va Qoraqalpog‘iston Respublikasida faoliyat yuritayotgan diniy soha vakillari, shuningdek, O‘zbekiston Respublikasi Din ishlari bo‘yicha qo‘mita va O‘zbekiston musulmonlari idorasining mutasaddi xodimlari tashrif buyurishdi. Bu haqda O‘zbekiston musulmonlari idorasining matbuot xizmati xabar berdi.
"Tobora globallashib borayotgan bugungi axborot asrida musulmon mamlakatlarida kechayotgan murakkab jarayonlarning asl mohiyatini anglash, turli aqidaparast kuchlarning osoyishtalikka putur yetkazish maqsadida chiqarayotgan fitnalarining oldini olish, halqaro islomiy tashkilotlar, islom olamidagi nufuzli ilmiy muassasalar, ulamolarning diniy ekstremizm va terrorizimga nisbatan bildirayotgan fikrlarini jamoatchilikka yetkazish, millatlararo totuvlik va diniy bag‘rikenglik muhitini mustahkamlash, ogohlik va hushyorlikni oshirish kabi muhim va o‘ta dolzarb masalalarda diniy soha xodimlari va ulamolarning rolini kuchaytirish maqsadida o‘tkazilgan ushbu anjumanni Davlat maslahatchisining o‘rinbosari M. Axmedjanov kirish so‘zi bilan ochib berdi. Shundan so‘ng so‘zga chiqqan notiqlar bugungi kunda dolzab bo‘lgan bir qator mavzularda ma'ruzalar qildilar. Jumladan, Yaqin Sharq mintaqasida kechayotgan ijtimoiy-siyosiy jarayonlarning mazmun-mohiyati, mamlakatimizda diniy ekstremizm va xalqaro terrorizmga qarshi kurash yo‘llari, barqarorlikka rahna solayotgan aqidaparast kuchlarning soxta da'volariga berilgan raddiyalar kabi mavzular ishtirokchilarda katta qiziqish uyg‘otdi", deyiladi xabarda.
Shuningdek, O‘zbekiston musulmonlari idorasi raisi Usmonxon Alimov so‘zga chiqib, ijtimoiy barqarorlikni saqlash, millatlar va dinlararo hamjihatlikni mustahkamlash, ogohlik va hushyorlikni oshirishda imom-xatiblarning o‘rni va vazifalari haqida gapirdi. Bu yo‘lda amalga oshirayotgan ishlar to‘g‘risida atroflicha to‘xtalib o‘tgan.
Anjuman ishtirokchilari aqidaparast oqimlar va terrorchi tashkilotlarning soxta da'volariga nisbatan o‘zlarining yakdil sof islomiy qarashlarini belgilab olgan.