Turkmaniston BMTning Osiyoda qurolsizlantirish bo‘yicha mintaqaviy markazini tashkil etishni taklif qildi. Bu masala 13 iyun kuni Turkmaniston prezidenti Qurbono‘g‘li Berdimuxamedov va BMT Bosh kotibi Pan Gi Mun o‘rtasidagi muzokaralar davomida ko‘tarildi.
Muzokaralar yakunlariga bag‘ishlangan matbuot anjumanida Turkmaniston prezidenti uchrashuv davomida Afg‘onistondagi vaziyatni tartibga solish masalasiga alohida e'tibor qaratilganini ma'lum qildi. Shu munosabat bilan Turkmaniston afg‘on muammosini faqatgina tinchlik yo‘li, siyosiy-diplomatik usullar bilan hal qilishga intilishidan iborat bo‘lgan bu boradagi pozitsiyasi ma'lum qilindi.
Shuningdek, qurollar tarqatilmasligi va qurolsizlantirish jarayonlarini mustahkamlash kabi dolzarb masalalarni hal qilishda hamda tegishli xalqaro-huquq bazasini kengaytirishga qaratilgan chora-tadbirlarni muhokama qilishda birgalikdagi harakatlarning muhimligi ta'kidlab o‘tildi.
Turkmaniston prezidenti bu haqda gapira turib, Markaziy Osiyoda yadroviy quroldan erkin hudud tashqil etish haqidagi kelishuvni amalga oshirilishi muhim ahamiyatga egaligini ta'kidlab o‘tdi.
BMT Bosh kotibi Ashxoboddagi BMTning Markaziy Osiyo uchun preventiv diplomatiya bo‘yicha mintaqaviy markazining sermahsul ishiga yuqori baho berdi. Pan Gi Mun Qurbono‘g‘li Berdimuhamedovga Afg‘oniston va Nepalga ko‘rsatilgan yordam va afg‘on qochqinlarini qo‘llab-quvvatlashdagi sa'y-harakatlari uchun minnatdorchilik bildirdi.
Turkmaniston prezidenti yuqori lavozimli mehmon sharafiga rasmiy kechki ovqat marosimini tashkil qildi.
