Tojikiston maxsus qo‘shinlarining sobiq komandiri, IShID safiga qo‘shilgan polkovnik Gulmurod Halimov internetda yangi videolavha joylashtirdi. Bu haqda Interfaks agentligi xabar bermoqda.
Videolavhada Halimov o‘zining aqldan ozib qolganligi haqidagi gaplarni inkor qilib, uni uyga qaytishga va qonun oldida javob berishga chorlagan ukasiga tahdid qilgan.
“Men soppa-sog‘man. Va hayratdaman. Agar telba bo‘lsam, meni qanday qilib AQShga tayyorgarlik ko‘rishga yubordingiz, polkovnik unvonini berib, uch marta medallar bilan taqdirladingiz? Agar men telba bo‘lsam, ichki ishlarning barcha polkovniklari ham telbadir”, – deydi Halimov o‘z videomurojaatida.
“Qasam ichamanki, qurolim faqat kofirlarga qarshi qo‘llanadi, – davom etadi u. – Agar ukam menga qarshi chiqib, kofirga aylansa, men shaxsan uning boshini olaman”.
Tojikiston matbuotida bir necha bor polkovnik telba deb atalgan edi. Bundan tashqari, u davlatga xiyonat qilishda ayblanib, Interpolga qidiruvga berildi.
31 may kuni Gulmurod Halimovning ukasi, adliya vazirligi xodimi, podpolkovnik Saidmurod Halimov akasiga ochiq xat yo‘llab, uni qaytib kelishga va qonunga taslim bo‘lishga undagan edi.