Afg‘oniston janubida joylashgan Gelmand viloyatida bir oila a'zolarini olib ketayotgan mikroavtobus yo‘l chetiga qo‘yilgan ancha katta kuchdagi portlovchi qurilmada portlab ketdi. Oqibatda oilaning 12 a'zosi halok bo‘ldi va yana 8 kishi turli og‘irlikdagi jarohatlar oldi. Afg‘oniston politsiyasining aytishicha, qurbonlar soni ortishi mumkin.
Ma'lumotlarga ko‘ra, oila rejalashtirilgan katta miqyosdagi aksilterrorchilik operatsiyasi o‘tkazilishidan xavfsirab o‘z turar joyini tark etib ketayotgan bo‘lgan.
Hech qaysi tashkilot terakt uchun javobgarlikni o‘z zimmasiga olmadi. Yo‘l chetiga portlovchi qurilmalar qo‘yib ketish “Tolibon” jangarilari uchun odatiy holdir. Ular bu portlovchi qurilmalarni asosan afg‘on askarlari va politsiyachilarini yo‘q qilish maqsadida qo‘yadilar, biroq ko‘pincha tinch aholi ham ularning qurbonlariga aylanadilar.
