Akula ustida syorfing uchganlar tabiat muhofazachilari tanqidiga uchradi

Internetda ikki erkak hozirda mavjud bo‘lgan akulalardan eng kattasi bo‘lgan ulkan kitsimon akula ustida syorfing uchayotgani tasvirlangan video paydo bo‘ldi.

Kitsimon akula suv yuzasiga yaqin juda sekin harakatlanib, insonlarga umuman hech qanday xavf solmaydi. Ko‘rinishidan videoda katerda sayr qilib yurgan erkaklar bundan xabardor bo‘lishgan va akulaning ustiga chiqib, uning belida syorfing uchishga qaror qilishgan.

Katerdagi boshqa dam oluvchilar katerdan turib buni vidoyega olishgan, hayqirib, kulib, o‘z hamrohlarini qo‘llab-quvvatlashgan.

Video tabiat muhofazachilari tomonidan keskin tanqidga uchradi, ular ushbu shaxslarga nisbatan ayblov qo‘yilishi kerakligini aytishmoqda.

“Ushbu videodan odamzodning yovvoyi tabiatga jirkanch munosabatini ko‘rish mumkin. Ular bunday bahaybat jonzotni ko‘rish baxtiga muyassar bo‘lganlaridan xursand bo‘lish o‘rniga, shunday ahmoqlarcha hunar ko‘rsatishga qaror qilishgan”, deyishdi tabiat muhofazachilari.

Video Facebook`da joylashtirilib, keyinroq o‘chirib tashlangan.