Ekvador prezidenti AQShni o‘z davlatiga bosim o‘tkazishda aybladi

Ekvador prezidenti Rafael Korrea Belarusga uyushtirgan rasmiy tashrifi vaqtida AQSh hukumati Ekvadorga nisbatan bosim o‘tkazish orqali mamlakatdagi vaziyatni izdan chiqarayotgani haqida aytib berdi. Bu haqda "BelTA" xabar bergan.

"Ular bizni inson huquqlariga rioya etmaganlikda ayblashadi. O‘zingiz tasavvur qiling, tinimsiz qotilliklar va jinoyatlar ro‘y berib turadigan, Guantanamo qamoqxonasida qiynoqlar amalga oshiriladigan davlat bizga shunday dedi. Bu bizni ranjitdi, axir biz inson huquqlariga to‘la ravishda amal qilamiz", deydi Korrea.

Uning aytishicha, AQSh ayni vaqtda Ekvador, Boliviya, Venesuela va Argentina mamlakatlaridagi vaziyatni izdan chiqarish maqsadida navbatdagi kampaniyani boshlagan.

Bundan tashqari, Korrea Minsk shahrini Ikkinchi jahon urushidan keyingi davr miqyosidagi kam sonli "Qahramon shaharlardan biri" deb atagan.