Kareliyada ralli paytida avtomobil g‘ildiragi ostidan otilib chiqqan tosh bir ayolning o‘limiga sabab bo‘ldi

Kareliyada o‘tkazilgan “Beliye nochi” rallisi paytida avtomobillardan birining g‘ildiragi ostidan otilib chiqqan tosh bir tomoshabin ayolning o‘limiga sabab bo‘ldi. Bu haqda TASS axborot agentligi xabar bermoqda.

O‘tkazilgan tekshiruv va barcha tafsilotlar aniqlashtirilgandan keyin poyganing maxsus uchastkasida mahalliy ayollardan biri tomoshabinlar uchun ajratilgan hududdan chiqib ketib, poyga mashinasining ostidan otilib chiqqan tosh zarbasidan halok bo‘lgani ma'lum bo‘ldi. Baxtsiz voqea poygalarning birinchi kuni, 26 iyunda sodir bo‘ldi. Ayolning jasadini poyga avtomobillaridan birining ekipaji Moskva vaqti bilan 19:00 larda aniqladi.

“Beliye nochi” Rossiyada qadimdan o‘tkazib kelinadigan poyga bo‘lib, ilk bor 1963 yilda o‘tkazilgan. 1995 yildan esa Kareliya hududida o‘tkazib kelinadi. Bu yerda ko‘plab keskin burilishlarga ega juda murakkab trassalar juda ko‘plab uchraydi. Poyga tashkilotchilarining ma'lumotlariga ko‘ra, bu poygalarni tomosha qilish uchun har yili taxminan 70 mingdan ziyodroq tomoshabin yig‘iladi.