Tunisdagi teraktdan keyin mamlakatga Yevropadan tashrif buyuruvchi sayyohlar soni keskin kamayib ketdi

Tunisdagi eng katta aeroportlardan biri, Monastir shahridagi Xabib Burgiba nomidagi aeroport 27 iyun kuni odatdagidan farqli o‘laroq, Sus shahridagi teraktdan keyin mamlakatga Yevropadan tashrif buyurayotgan sayyohlar soni bo‘yicha rekord darajadagi past natijani qayd qildi.

Aeroport vakilining bergan ma'lumotlariga ko‘ra, mamlakatga Londondan 40 yo‘lovchi, Manchesterdan 34, Belgiyadan 64 yo‘lovchi tashrif buyurgan. “Odatda bunday paytda yuzlab sayyohlar kelar edi. Biroq bugun kirishda umuman hech kim yo‘q, hamma navbatlar jo‘nab ketish yo‘nalishida kuzatilmoqda”, deb aytmoqda aeroport vakili.

Tunis OAVlarining xabar berishicha, yuzlab xorijiy sayyohlar mamlakatda dam olishdan bosh tortib, mehmonxonalarni tark etmoqda. Tunis hukumati sayyohlarning xavfsizligi uchun barcha choralar qabul qilinganini aytishiga qaramasdan, sayyohlar safarlarini tugatmoqda va hali boshlanmaganlarini bekor qilmoqda.

Tunis davlat g‘aznasiga tushadigan xorijiy valyutadagi umumiy tushumlarning 20 foizini sayyohlikdan oladi. Bu sohada 500 mingga yaqin odam faoliyat yuritadi.

Tunis hukumati Susdagi teraktni “milliy iqtisodiyotga dahshatli zarba bo‘ldi” deb aytmoqda. Susdagi teraktdan keyin mamlakat rahbariyati ushbu yildagi sayyohlik mavsumi kasodga uchrashini taxmin qilmoqda.