Istomin Nottingem turniri finalidagi g‘alabadan keyin ATP reytingida 30 pog‘ona yuqoriladi

O‘zbekistonning birinchi raqamli raketkasi Denis Istomin Londonda bo‘lib o‘tadigan Uimbldon turniri boshlanishi arafasida ATP reytingida 30 pog‘ona yuqorilab, 62 o‘ringa joylashdi.

Eslatib o‘tamiz, 27 iyun kuni Istomin Nottingem shahrida o‘tkazilgan  "AEGON Open" tennis turnirida g‘alaba qozonib, o‘z faoliyatidagi ilk titulni qo‘lga kiritgandi. Bir soatu 42 daqiqa davom etgan bahsda u reytingda 44-pog‘onada qayd etilgan amerikalik Sem Kuerani 7:6, 7:6 hisoblarida taslim etgandi.

Final bahsida Istomin 7ta eys zarbani amalga oshirdi. Ikkita breykka ega bo‘ldi va uch bor to‘p uzatishda xatolikka yo‘l qo‘ydi. Kuerri esa 12ta eys zarba, ikkita breyk-point va 6ta qo‘shxato qayd etdi. Ikki tennischining o‘zaro uchrashuvlardagi hisob 4:3ga yetdi, hozircha Kuerri foydasiga.

Nottingem turnirining mukofot jamg‘armasi 644,065 yerodan iborat bo‘lib, Denis Istomin g‘olib sifatida 79,345 yevro mukofot puli hamda 250 reyting ochkosiga ega bo‘ldi. 

29 iyun holatiga ko‘ra, Denis Istomin 780 ochko jamg‘argan holda 62-o‘rinda bormoqda.

Endi u joriy haftada start oladigan "Katta Dubulg‘a" turnirlaridan biri "Uimbldon"da ishtirok etadi. U birinchi bahsini ispaniyalik Albert Ramos-Vinolasga (reytingda 65 o‘rin) qarshi o‘tkazadi.