Olimlar dunyodagi eng chuqur inlar qaziydigan jonivorlarni aniqladi

Avstraliyalik olimlar umurtqali jonivorlardan qay biri dunyodagi eng chuqur inlarni qazishini aniqladi. Bu Varanus Panopter echkiemarlari bo‘lib chiqdi.
Ushbu sudralib yuruvchilar 3.6 m gacha inla qazishi mumkin. Tadqiqot natijalari Biological Journal of the Linnean Society jurnalida chop etildi.
Kaltakesaklarning spiralsimon inlari olimlar diqqatini XIX asrdayoq jalb qilgan edi. Ilgari ularni Palaeocastor qunduzlari qaziydi, degan taxmin mavjud edi. Ammo tadqiqotchi Shon Dudi echkiemarlar yashaydigan hududda bunday inlar ko‘pligini aniqlashga muvaffaq bo‘ldi. Tadqiqot Avstraliya shimolidagi Kimberli okrugida o‘tkazildi.
Biologlar 52ta inning chuqurligini va haroratini o‘lchab chiqishdi.
Inning oxirida maxsus kenglik yaratilib, u yerga echkiemarlar tuxum qo‘yadi. Bunday chuqurlikda harorat o‘zgarmasligi bois embrion yaxshi rivojlanadi. Bundan tashqari, indagi namlik tashqariga nisbatan kuchliroq, bu tuxumning sakkix haftalik inkubatsiya davrini qurg‘oqchil mavsumda ham o‘tkazib olish imkonini beradi.
Inlar nega spiralsimon qurilishi masalasi esa hanuzgacha aniqlashtirilgan emas. Bunday in qazilish texnikasi ko‘p mehnatni talab qiladi, Dudi hatto qazish paytida yer o‘pirilib, tuproq ostida qolib ketgan kaltakesaklarning jasadlarini topdi.