Ayolni yelkada ko‘tarib yugurish bo‘yicha chempionatga rekord darajadagi qatnashchilar kelishi kutilmoqda

1992 yildan buyon Finlyandiyaning Sonkayarvi shahrida har yili o‘tkazilishi an'ana tusini olgan ayollarni yelkada ko‘targan holda masofani bosib o‘tish chempionatining bu yilgi musobaqasiga rekord darajadagi ishtirkochilar kelishi kutilmoqda. Bu haqda Yle agentligi xabar bergan.

Ayni vaqtda chempionatda ishtirok etish istagi bo‘yicha 70 juftlikning arizasi qabul qilingan. Ishtirokchilarning dastlabki vakillari Sonkayavriga yetib kelishgan.

"Chempionatga bundan ko‘p ishtirokchi kelishi hali kuzatilmagandi", deydi musobaqa tashkilotchilaridan biri Kaysa Xyunyunen.

Chempionatni yoritish uchun Rossiya, Buyuk Britaniya, Germaniya, Daniya va Niderlandiya kabi mamlakatlardan OAV vakillari ham tashrif buyurishadi.

Bu yil yigirma yilligi nishonlanadigan chempionatda shu vaqtgacha eng ko‘p ishtirokchi kelishi 2008 yilda qayd etilgan, o‘sha safar 45 juftlik o‘z omadini sinab ko‘rgandi.

Ma'lumot uchun, bu turnir qoidasiga ko‘ra, ishtirokchi o‘z yelkasida rafiqasi yoki sherigini ortmoqlagan holda 253,5 metrli qumli, o‘tli, loyli, to‘siqli yo‘lni bosib o‘tishi va birinchi bo‘lib marraga yetib kelishi kerak bo‘ladi.

Uning yelkasidagi ikkinchi ishtirokchining yoshi 17dan, vazni esa 49 kilogrammdan kam bo‘lmasligi talab qilinadi.

Qayd etish joizki, bunday turnirda eng ko‘p marta Estoniya, AQSh va Avstraliya vakillari g‘alaba qozonishgan.

Shu vaqtgacha o‘rnatilgan rekord natija - 55 sekund bo‘lib, 2001 yilda Tallin shahridan kelgan Margot Uusorg va Birgit Ulrixt tomonidan qayd etilgan.