Gretsiyada bo‘lgani kabi, Ukrainada ham iqtisodiy inqiroz siyosiy inqirozni keltirib chiqarishi mumkin. Bu haqda AQSh Davlat departamentining MDH davlatlari bo‘yicha sobiq koordinatori, Bill Klinton ma'muriyati a'zosi bo‘lgan Stiven Sestanovich yozmoqda.
Uning so‘zlariga qaraganda, Ukraina va Gretsiyadagi vaziyat o‘zaro keskin farqlanadi, lekin har ikkala davlatda ham ikkita inqiroz bir-biriga ta'sir o‘tkaza boshlagan. Bunday vaziyatda esa hukumat xalqaro ittifoqchilar va homiylar bilan til topishishga qiynaladi.
Ukrainada hozircha bunday vaziyat yuzaga kelmadi, ammo masala murakkablashib borayotgani barchaga oydin. Joriy yilning birinchi choragida mamlakat yalpi ichki mahsuloti 17 foizga tushib ketdi, bosh vazir Arseniy Yatsenyuk va uning ma'muriyati reytingi aytarli yuqori emas. Sestanovichning fikricha, yaqin orada Ukraina Xalqaro valyuta jamg‘armasiga va xorijiy kreditorlarga murojaat qilishga majbur bo‘ladi.
“Ukraina prezidenti Pyotr Poroshenkoning islohotlar o‘tkazishga bo‘lgan intilishlariga qaramay, u oligarxdir. Mamlakat qashshoqlashishiga qaramay, u superboy biznesmenlardan biri bo‘lib qolmoqda. Natijada xalq mamlakatda rostan ham oligarxlarga qarshi kurash ketayotganidan shubhalanmoqda”, – xulosa qiladi tahlilchi.