06:55 / 03.07.2015
2510

Sony fotomodullar ishlab chiqarish hajmini oshirish uchun 3,6 mlrd dollar sarmoya jalb qilmoqchi

Yaponiyaning Sony kompaniyasi tasvirlar datchiklari ishlab chiqarish bilan bog‘liq tez sur'atlarda o‘sayotgan biznesga investitsiya kiritish maqsadida 440 mlrd iyenlik (3,6 mlrd dollar) aksiyalarini sotishni rejalashtirayotganini e'lon qildi.

Reuters axborot agentligining ma'lum qilishicha, kompaniya 321 mlrd iyenni aksiyalarning ochiq emissiyasidan va 119 mlrd iyenni konvertatsiya qilinadigan obligatsiyalar chiqarish orqali jalb qilishni mo‘ljallamoqda. Shu tariqa gap korporatsiyaning joriy bozor narxining (33,6 mlrd dollar) 10 foiziga teng bo‘lgan daromad haqida ketmoqda.

Kompaniyada aytilishicha, olingan pullardan katta qismi fotomodullar va boshqa yarimo‘tkazgichli komponentlarni ishlab chiqish bilan shug‘ullanuvchi Devices bo‘linmasidagi ilmiy-tadqiqot ishlariga va ishlab chiqarishni kengaytirish uchun sarflanadi.

Sony yaqin uch yilda tasvir datchiklari savdosini 62 foizga, ya'ni 12,3 mlrd dollargacha oshira olishini bashorat qilmoqda. 2015 yilning 31 martiga ko‘ra, kompaniyaning hisob raqamlarida 11,5 mlrd dollarik sof pul mablag‘lari yig‘ilib qolgan.

Sony ning qimmatbaho qog‘ozlar sotish haqidagi e'loni aksiyalarining 8,3 foizga qadrsizlanishiga olib keldi. Bunday holat 2014 yilning 18 sentabridan kuzatilmagan edi. Joriy yilning boshidan Sony aksiyalari 40 foizga qimmatlashgan edi.

Top