FQB 5 nafar xaker haqidagi ma'lumot uchun 4,2 mln dollarlik mukofot beradi

AQSh Federal qidiruv byurosi 5 nafar xavfli xakerning qayerga bekingani haqida ma'lumotlar uchun jami 4,2 mln dollar miqdoridagi mukofot e'lon qildi. Bu haqda The Washington Post xabar bermoqda.

Xabarda yozilishicha, mukofotning asosiy qismi, 3 mln dollar rossiyalik Yevgeniy Bogachev haqidagi ma'lumot uchun ajratilgan. U 1 mln donadan ortiq kompyuterdan ma'lumotlarni o‘g‘irlaganlikda ayblanmoqda.

Shuningdek, ruminiyalik Nikulaye Popesku ham "xavflilik darajasi" bo‘yicha Bogachevdan qolishmasligi aytilgan. U haqdagi ma'lumot uchun 1 mln dollarlik mukofot va'da qilingan.

Rossiyalik Aleksey Belan (100 ming dollar), latviyalik Peteris Saxuvors (50 ming dollar) va hindistonlik Kumar Jayn (50 ming dollar) kabi xorijlik xakerlar bo‘yicha ma'lumotlar uchun ham kichikroq miqdordagi mukofotlar berilishi ma'lum qilingan.

Bu xakerlar zararli viruslar, soxta internet savdolari, virus dasturlari yaratish bilan shug‘ullanganlikda ayblanadi.