16:41 / 04.07.2015
3663

Fransiyalik shifokorlar o‘zbekistonlik bolalarda kardiologik jarrohlik amaliyotlarini o‘tkazishadi

“Sen Yolg'iz Emassan” fondi taklifi bilan Fransiyaning “Umid rishtalari” Shifokorlar Uyushmasi vakillari Toshkentga mahalliy bolalarda tibbiy tekshiruv va kardiologiya sohasidagi murakkab jarrohlik muolajalarini bajarish uchun tashrif buyurishdi. Bu haqda Lola Karimova-Tillayeva o‘zining feysbukdagi sahifasida ma'lum qilgan.

“400 nafar shifokordan iborat bo‘lgan mazkur uyushma mana 27 yildirki, dunyo davlatlari bo‘ylab mahalliy shifokorlar bilan birgalikda bolalarga zarur tibbiy yordam ko‘rsatib, o‘z malakalari bilan o‘rtoqlashib, turli treninglar tashkil etib kelmoqda. Bu tashkilot bolalar jarrohiligi sohasida yiliga 30 mamlakatda 5000dan ziyod operatsiyalar o‘tkazadi.

Hamkorligimiz doirasida bolalar kardiojarrohi professor Olive Baron, bolalar vistseral jarrohi professor Per Xelardo hamda bolalar reanimator-anesteziologi Katrin Amreyn fondimiz taklifi bilan konsultatsiya, tibbiy tekshiruv va kardiologiya sohasidagi murakkab jarrohlik muolajalarini bajarish uchun Toshkentga Akademik V.V. Voxidov nomidagi Respublika ixtisoslashtirilgan jarrohlik markaziga tashrif buyurdi. Professor Olive Baron va Katrin Amreyn bolalarni tibbiy tekshiruvdan o‘tkazganlaridan so‘ng farg‘onalik ikki yoshu sakkiz oylik Ismoilova Mubinaga jarrohlik muolajasini o‘tkazish xulosasiga kelishdi. Mubinada jiddiy tug‘ma yurak patologiyasi mavjud bo‘lib, qizaloqqa tezkor jarrohlik aralashuvi zarur edi.

Professor Per Xelardo o‘z navbatida Mehribonlik uyida tarbiyalanib kelayotgan bir necha bolalarni ko‘rikdan o‘tkazib, zarur muolajalarni tayinladi. Shu bilan birga uyushma vakillari mahalliy bolalar jarrohlari uchun ma'ruza va treninglar olib borishdi. Jumladan, professor Olive Baron Fransiyaning Nant shahridagi pediatriya markazining ishi bilan o‘rtoqlashdi. Gipotermiyani o‘rtacha me'yorda ishlatish, ya'ni jarrohlik amaliyoti jarayonida bosh miyaga keluvchi kislorodni to‘xtatmagan holda tana haroratining imkon qadar past ko‘rsatkichlari bilan bog‘liq yangi uslub haqida batafsil so‘zlab berdi. Mazkur yangi uslublardan asosiy maqsad yangi tug‘ilgan chaqaloqlarga amalga oshiriladigan jarrohlik muolajalarining xavfsiz o‘tib, undan keyingi kuzatiladigan nevrologik asoratlarni kamaytirishdir. Bizning mutaxassislarimiz bolalar jarrohligi, reanimatsiya, tashxis va davolashning yangi uslublariga oid xorijlik shifokorlarning malakasini o‘rganish imkoniyatiga ega bo‘lishdi. Umid qilamanki, hamkorligimiz bolalar jarrohligini O‘zbekistonda o‘z vaqtida rivojlanishiga turtki bo‘ladi. Ushbu tashabbus dunyoning turli davlatlaridagi insonlarning oliyjanob harakatini birlashtirganidan xursandman”, deb yoziladi Lola Karimova-Tillayevaning feysbukida.

Top