Turkiya yo‘lovchi tashuvchi Turkish Airlines aviakompaniyasi Bangkok — Istanbul yo‘nalishida harakatlanayotgan samolyoti bortda portlovchi modda borligi bilan qilingan tahdid sababli Nyu-Deli aeroportiga qo‘nishga majbur bo‘ldi. Bu haqda NTV telekanali xabar tarqatdi.
Parvoz davomida samolyot xodimlari hojatxonalarning birida layner bortida portlovchi modda borligi bilan tahdid qilingan yozuvni topib olishgan. Natijada Airbus A330 rusumli samolyot Hindiston poytaxtidagi aeroportning xavfsiz hududiga qo‘ngan. Salonni tekshirish uchun 148 nafa yo‘lovchi boshqa hududga ko‘chirilgan. Tekshiruvdan so‘ng qayta uchishga qaror qilingan.
Bu Turkiya kompaniyasi bilan yil boshidan sodir bo‘layotgan oltinchi voqea sanaladi. Oldingi holatlarda ham hojatxonadan portlovchi modda borligi haqidagi yozuvlar topilgan. Barcha ma'lumotlar keyinchalik yolg‘onligi aniqlangan.