Serena Uilyams va Mariya Sharapova Uimbldon turniri tarixida uchinchi marta uchrashadi

Buyuk Britaniya poytaxti Uimbldon shahrida 29 iyun kuni boshlangan Uimbldon turnirining chorak final bosqichi yakunlandi. Endilikda yakkalik bahslarida 8 nafar tennischi qolgan.

10 iyul kuni o‘tkaziladigan ayollar o‘rtasidagi yarim final juftliklarida Serena Uilyams (AQSh) va Mariya Sharapova (Rossiya) uchrashadi. Ikkinchi juftlikda esa polshalik Agneshka Radvanska ispaniyalik Garbine Mugurusaga qarshi kortga chiqadi.

Uimbldon turnirlarida 5 marta g‘alaba qozongan Serena Uilyamsga qarshi shu turnir tarixida uchinchi marta o‘ynaydigan Mariya Sharapova bu turnirda faqat bir marta, 2004 yilda aynan Serenani mag‘lub etish orqali g‘olib bo‘lgan. O‘shanda dunyoning birinchi raqamli raketkasiga qarshi o‘ynagan Sharapova turnirning 13-raqamli tennischisi edi.

Joriy mavsumda 33 yoshli Serena "Katta Dubulg‘a"ning dastlabki ikki turnirida g‘alaba qozonib ulgurgan. U yanvar oyida Avstraliya Ochiq chempionati finalida aynan Mariya Sharapovani mag‘lub etgandi. May-iyun oylarida o‘tkazilgan "Rolan Garros" turnirida ham amerikalik tennischi tengsiz deb topildi.

Lekin, qayd etish joizki, oxirgi mavsumlarda Serena Uilyams Uimbldon turnirlarida omadsiz ishtirok etmoqda. U 2012 va 2013 yillarda finalga chiqib, fransiyalik Marion Bartoliga, 2014 yilda esa chexiyalik Petra Kvitovaga imkoniyatni boy bergandi.

Mariya Sharapova esa, yuqorida ta'kidlanganidek, 2004 yilda, 17 yoshida Uimbldon turnirida g‘alaba qozonish evaziga o‘z titullari hisobini ochgandi. U 2011 yilda ham shu turnir finaliga chiqqan, lekin Petra Kvitovaga mag‘lub bo‘lgan.

Ushbu ikki tennischi 2007 va 2015 yillarda Avstraliya Ochiq chempionati finallarida to‘qnashgan va rossiyalik tennischi ikki safar ham bahslarni boy bergan. 2013 yilda esa shunday holat "Rolan Garros" finalida ro‘y bergan.

Ushbu ikki tennischining Uimbldondagi ikkinchi to‘qnashuvi 2010 yilda, chorak final bosqichida ro‘y bergan, bu bahsda Sharapova jarohatlari tufayli mag‘lub bo‘lgan. O‘sha yili u turnirning 16 raqamli raketkasi sifatida tasniflangandi.

Joriy yilgi turnirga Mariya Sharapova 4 raqamli tennischi sifatida tashrif buyurgan. U avvalgi bosqichlarda Joanna Kontu (Buyuk Britaniya), Rixel Xogenkamp (Niderlandiya), Irina Begu (Ruminiya), Zarina Diyas (Qozog‘iston) va Koko Vandevege (AQSh) kabi tennischilarni turnirdan chiqarib yubordi.

Uilyams esa yarim final yo‘lida Margarita Gasparyan (Rossiya), Timea Babosh (Vengriya), Xiter Uotson (Buyuk Britaniya), o‘z opasi Vinus Uilyams hamda belaruslik Viktoriya Azarenkoni mag‘lub etdi.

9 iyul kuni o‘tkaziladigan yarim final o‘yinlarining dastlabkisi Agneshka Radvanska va Garbine Mugurusa o‘rtasida Toshkent vaqti bilan soat 17:00da boshlanadi. Ulardan keyin esa kortga Serena Uilyams hamda Mariya Sharapova chiqishadi.