2015 yilda “Sharq” nashriyot-matbaa ijodiy uyi tomonidan so‘fiylik tariqatining yirik namoyandalaridan biri shayx Zangi otaga bag‘ishlangan muallif Akmal Saidovning “Hazrat Zangi ota” deb nomlangan kitobi chop etildi.
O‘zbek tilida chop etilgan ushbu nashr kirish so‘zi, to‘rt bob, xulosa qismi, oltita tildagi taqrizdan iborat.
Kitobga berilgan taqrizda aytilishicha, ushbu kitobda gap so‘fiylikning yirik namoyandalaridan biri, buyuk avliyo, shayx Mavlon Zangi ota (Oyxo‘ja ibn Toshxo‘ja) haqida ketadi. Turkistonlik buyuk avliyo, katta hurmatga sazovor bo‘lgan Zangi ota Xo‘ja Ahmad Yassaviyning ustozi – Asrlon boboning evarasi bo‘lgan.
Kitobda Zangi otaning hayoti, xususan ismi, kelib chiqishi, rafiqasi, sulolasi, tug‘ilgan va vafot etgan kunlari, ona yurti, amalga oshirgan sayohlatlari va izlanishlari, ustozlari va shogirdlari, uning Yassaviylik tariqatida tutgan o‘rni, maqbarasi va ziyoratgohi haqida qisqacha ma'lumotlar berilgan.
Zangi ota majmuasi – noyob tarixiy-arxitektura, madaniy-ma'naviy majmua bo‘lib, nafaqat O‘zbekistonda, balki butun Markaziy Osiyoda ham ko‘p ziyorat qilinadigan qadamjo hisoblanadi. Kitobda bu majmua Amir Temur tomonidan barpo etilgani, temuriylar avlodi bo‘lgan olim va podshoh Mirzo Ulug‘bek tomonidan qayta ta'mirlangani hamda mustaqillik yillarida bu qadamjoda amalga oshirilgan obodonlashtirish ishlari haqida ma'lumotlar keltirilgan.
Kitobda Zangi ota faoliyati va ma'naviy ta'limotlari misolida so‘fiylik haqida ko‘pgina qiziq ma'lumotlar bayon etilgan. Kitobda, shuningdek, Zangi otaning karomatlari, shaxsiy fazilatlari, u haqidagi she'rlar va afsonalar, uning Sharq va G‘arbdagi merosining o‘rganilishiga misollar berilgan.
Kitob Inson huquqlari bo‘yicha O‘zbekiston Respublikasi Milliy markazi direktori, huquqshunoslik fanlari doktori, professor Akmal Saidov tomonidan yozilgan.
Kitobga O‘zbekiston musulmonlar boshqarmasi raisi, muftiy Usmonxon Alimov mas'ul muharrirlik qilgan.
Ilmiy-ommabop uslubda yozilgan ushbu kitob so‘fiylik tarixi bilan qiziquvchilar va keng kitobxonlar ommasi uchun mo‘ljallangan.