Universiada-2015: O‘zbekiston terma jamoasi turnirni 39 o‘rinda yakunlamoqda

3 iyul kuni Janubiy Koreyaning Kvanchju shahrida boshlangan XXVIII yozgi Universiada o‘yinlari 14 iyul kuni yakunlanadi. Butunjahon Universiada musobaqalari O‘zbekiston terma jamoasi uchun muvaffaqiyatsiz yakunlanmoqda.

Musobaqalarning yopilish marosimi bugun, 14 iyul kuni o‘tkaziladi.

Ayni damda mezbonlar 47ta oltin, 32ta kumush va 29ta bronza (jami 108 medal) bilan birinchi o‘rinni ta'minlashgan.
O‘z navbatida Rossiya terma jamosi ikkinchi o‘rinda joylashgan (34ta oltin, 22ta kumush, 49ta bronza).
Xitoy ham 34ta oltin medal olganiga qaramasdan, qolgan vaqt ichida ruslarga o‘tib keta olmasligi aniq bo‘lib ulgurgan. Shuningdek, bu jamoaga boshqa jamoalar yeta olmasligi kafolatlangan.

Terma jamoalar           O         K          B          J

1. Janubiy Koreya     47        32        29        (108)
2. Rossiya                    34        39        49        (122)
3. Xitoy                      34        22        16        (72)
4. Yaponiya                   25        25        35        (85)
5. AQSh                       20        15        18        (53)
6. Fransiya                 13        9          8          (30)
7. Italiya                   11        14        17        (42)
8. Ukraina                  8          17        6          (31)
9. Eron                       7          2          6          (15)
10. Tayvan                6          12        18        (36)

13 iyul kuni Janubiy Koreyaning Kvanchju shahrida davom etayotgan Butunjahon talabalarining Universiada o‘yinlarida bugun o‘zbekistonlik Yelizavetta Nazarenkova alohida mashqlar bo‘yicha o‘tkazilgan musobaqalarda ishtirok etdi.

Ushbu tajribali sportchi tasma bilan bajariladigan mashqlarda 17.650 ball jamg‘arib, beshinchi o‘rinni band etdi. To‘p bilan bajariladigan mashqlarda Yelizavetta Nazarenkova 17.350 ball bilan 6-o‘rinni egalladi. Bulavada bajariladigan mashqlar bo‘yicha bo‘lib o‘tgan musobaqada esa Yelizavettaning chiqishini hakamlar 17.600 ball bilan baholashdi va yurtdoshimiz yana beshinchi o‘rinni egalladi.

Shu tariqa, akademik eshkak eshish, yengil atletika, taekvondo (WTF), tennis, qilichbozlik, sport va badiiy gimnastika hamda dzyudo musobaqalarida qatnashgan hamyurtlarimiz birorta medalni qo‘lga kirita olishmadi. Birgina taekvondist Dmitriy Shokin olib bergan oltin medal evaziga O‘zbekiston terma jamoasi turnirni 39 o‘rinda yakunlamoqda.

Taqqoslash uchun O‘zbekiston talabalaridan iborat terma jamoa 2013 yilda Qozonda bo‘lib o‘tgan Universiada musobaqalarida 2ta oltin, 7ta kumush va 10ta bronza medalini qo‘lga kiritishgandi.