Xurshid Tojiboyev Rio-2016 olimpiadasi yo‘llanmasi uchun Polyanskiy bilan jang o‘tkazadi

Boks bo‘yicha APB (AIBA Pro Boxing) turniri 60 kg vazn toifasidagi janglarning barcha 3ta seriyasiga Toshkent shahri mezbonlik qiladi. Ushbu musobaqaning dastlabkisi 30 may kuni o‘tkazilgan va o‘shanda o‘zbekistonlik Xurshid Tojiboyev raqibi irlandiyalik Devid Joysni 3:0 hisobida mag‘lub etgan edi.

Aytish kerakki, Xurshidning bu galgi raqibi ilk jangda braziliyalik Robson Konseysaoni imkoniyatsiz qoldirgan rossiyalik Dmitriy Polyanskiy bo‘ladi.
Eslatib o‘tamiz, aynan ushbu ikkinchi uchrashuvda raqibini yenga olgan charm qo‘l qop ustasiga Rio-2016 olimpiadasi yo‘llanmalari taqdim etiladi.
Tojiboyev bu uchrashuvga qadar Polyanskiy bilan uchrashgan va unda g‘alaba qozongan. Ushbu janglarning uchinchi bosqich, ya'ni finalida g‘oliblikni qo‘lga kiritgan bokschi chempionlik kamariga ega bo‘ladi. Bu uchrashuv ham Toshkentda 19 sentabr kuni bo‘lib o‘tadi. Musobaqalar O‘zbekiston Boks federatsiyasi, O‘zbekiston Madaniyat va sport ishlari vazirligi, O‘zbekiston Milliy olimpiya qo‘mitasi va Xalqaro havaskor boks assotsiatsiyasi (AIBA) bilan hamkorlikda o‘tkazilmoqda.

Uchrashuvlar jadvali 60 kg

O‘tkazilish joyi: Toshkent, 18 iyul kuni, «O‘zbekiston» sport saroyi

Xurshid Tojiboyev (O‘zbekiston) va Dmitriy Polyanskiy (Rossiya)
Devid Joys (Irlandiya) va Robson Konseysao (Braziliya)
Charli Suares (Filippin) va Domeniko Valentino (Italiya)
Chitu Shafiq (Benin) va Artur Bril (Germaniya).