Avstraliya Ukrainada qulagan Boeing halokati joyida olingan videoning haqiqiyligini tekshiradi

Avstraliya bir yil muqaddam Ukrainada, Boeing halokati joyida ayirmachilar tomonidan suratga olingan hamda News Corp mediakompaniyasi tomonidan tarqatilgan videoning haqiqiyligini tekshiruvdan o‘tkazadi. Bu haqda Avstraliya tashqi ishlari vaziri Juli Bishop bayonot berdi.
Malaysia Airlines aviakompaniyasiga tegishli Boeing yo‘lovchi layneri Amsterdamdan Kuala-Lumpurga MH17 reysini amalga oshirayotgan chog‘da 2014 yilning 17 iyulida Donbassda ayirmachilar tomonidan urib tushirilgan edi. 283 yo‘lovchi va 15 ekipaj a'zosi halok bo‘ldi. Ular orasida 10ta davlat fuqarolari bor edi. Voqea Niderlandiya Xavfsizlik kengashi tomonidan taftish qilinmoqda – yo‘lovchilarning asosiy qismi ushbu davlat fuqarolari edi.
Avstraliya jurnalistlari tomonidan tarqatilgan videolavhada samolyot qoldiqlari yaqinida o‘zaro va telefon orqali suhbat qurayotgan insonlar qayd qilingan. Bishop xonimning aytishicha, ushbu videolavha Niderlandiya kengashining taftish ishini bir qadar osonlashtirishi mumkin. Aynan shu tufayli mazkur masalada tekshiruv ishlari o‘tkaziladi.
Shuningdek, vazir ushbu halokat yuzasidan xalqaro tribunal tashkil etilishi zarurligini yana bir bor ta'kidladi.