Malayziya korrupsiya ishini yoritayotgan yirik saytlardan birini bloklab qo‘ydi

Malayziya rahbariyati internetdagi eng taniqli muxolifatchi saytlardan birin bloklab qo‘ydi. Channel News Asia telekanalining xabar berishicha, bunga sayt olib borayotgan aksilkorrupsiya surishtiruvi, shuningdek, bosh vazir Najib Razzoqning shaxsiy hisobiga 700 mln dollar o‘tkazilgani haqidagi xabarning chiqishi sabab bo‘lgan.

Kommunikatsiya va multimedia ishlari bo‘yicha milliy qo‘mitada ma'lum qilinishicha, The Sarawak Report saytining yopilishiga rasmiy sabab sifatida tekshirilmagan axborotning chop qilinishi va milliy barqarorlikka tahdid ko‘rsatilgan. Shu bilan birga, idora vakillari bloklash vaqtinchalik amal qilinishiga ishontirishdi. Unga qadar bosh prokuratura, markaziy bank va akslikorruptsion qo‘mita vakillaridan iborat maxsus komissiya sayt faoliyatini tekshiruvdan o‘tkazadi.

Sayt The Wall Street Journal bergan ma'lumotlarga tayangan holda bosh vazir 1MDB davlat jamg‘armasi bilan bog‘liq bir qancha kompaniyalardan 700 mln dollar olganini xabar qilgandi. Bir necha kundan so‘ng gazeta bu bilan bog‘liq hujjatlarni ham chop etgan edi. Hukumat rahbarining o‘zi bu ma'lumotlarni inkor qilib, muxolifatchilarni “siyosiy sabotaj”da ayblamoqda.