To‘yda boshidan pul sochilishiga qarshilik ko‘rsatmagan Ozodbek Nazarbekov tanqidga uchradi

O‘tgan haftada Facebook, Telegram va Whatsapp kabi ijtimoiy tarmoqlarda O‘zbekiston xalq artisti Ozodbek Nazarbekov bilan bog‘liq video tarqaldi.

“Darakchi” nashri bildirishicha, mazkur videoda to‘y sahnasida xonish qilayotgan Nazarbekovning ustidan ikki boyvachcha pul sochayotgani, bunga nisbatan xonandaning qo‘lini ko‘ksiga qo‘yib qulluq qilib turgani tasvirlangan. Ushbu holat tufayli xonanda yana tanqidlar nishoniga aylangan.

“Mazkur tasvirda Nazarbekov pul sochayotgan yigitlarni sahnadan turtib tushirishi yoki ularning harakatiga e'tiroz bildirib, qarshilik ko‘rsatishi mumkin edi” deb yozadi shou biznes nashri.

Avvalroq xonanda O.Nazarbekov qushlar bilan bezatilgan antiqa taom oldida tushgan surati tufayli isrofgarlikda ayblangan edi.