Janubiy Koreyada AQSh elchisini o‘ldirish bilan tahdid qilgan shaxs hibsga olindi

Janubiy Koreya politsiyasi 33 yoshli shaxsni Oq uyga AQShning Seuldagi elchisi Mark Lippertni o‘ldirish bilan tahdid qilib, maktub yuborgani uchun hibsga oldi.

Renxap agentligi bergan xabarga ko‘ra, Seul politsiyasiga 14 iyul kuni AQShning Seuldagi elchixonasidan shu masala bo‘yicha murojaat kelib tushgan.

Tergovda aniqlanishicha, ushbu shaxs Oq uyga shu maqsadini ifodalash uchun ingliz tilida "almoyi-jalmoyi" gaplar bilan maktub yozgan.

Ayni vaqtda u o‘ziga qo‘yilayotgan ayblovni tan olmagan.

Eslatib o‘tamiz, shu yilning 6 mart kuni Koreya birlashuvi tarafdori bo‘lgan 55 yoshli Kim Ki Chjon AQShning Janubiy Koreyadagi elchisi Mark Lippertga 25 santimetrli pichoq bilan hujum qilib, jarohat yetkazgan edi. Elchi kuchli qon ketishi bilan kasalxonaga yetkazilgan, u yerda uning jarohatiga 80 ta chok tushirilgandi.