UYeFAning amaldagi rahbari Mishel Platini FIFA prezidentligi uchun saylovga o‘z nomzodini qo‘yishi haqida rasman ma'lum qildi. Bu haqda UYeFA rasmiy saytida e'lon qilingan.
"Men juda ko‘p o‘ylashlardan keyin, futbolning va o‘zimning kelajagim uchun qaror qabul qildim. Men FIFA rahbarligiga saylansam, sizlarning ko‘mak va qo‘llab-quvvatlarishingiz bilan ish olib boraman.
Shunday vaqtlar bo‘ladiki, o‘z taqdiringni o‘zing hal qilishing kerak. Men bu qarorim o‘z taqdirim va FIFA kelajagida burilish nuqtasiga aylanishini his qilmoqdaman", deydi Platini.
Eslatib o‘tamiz, FIFAning yangi rahbarini aniqlash uchun 2016 yilning 26 fevralida saylov o‘tkaziladi. Hozirgacha braziliyalik murabbiy Ziko hamda argentinalik Diyego Armando Maradona bu saylovda ishtirok etish niyatini ma'lum qilgan. FIFAning amaldagi rahbari Yozef Blatter esa 2 iyun kuni tashkilotda poraxo‘rlik bilan bog‘liq mojarolar boshlanganidan keyin muddatidan avval o‘z lavozimini tark etishga qaror qilgandi.