08:03 / 31.07.2015
2304

Amazon dronlar uchun maxsus havo koridorini yaratishni taklif qildi

Amazon ancha vaqtdan beri mahsulotlarni dronlarda yetkazib berish loyihasi ustida ish olib bormoqda. Uning amalga oshirilishini dronlardan tijoriy maqsadda foydalanishni ta'minlashga imkon beruvchi AQSh qonunchiligida zarur o‘zgarishlar yo‘qligi orqaga surmoqda. AQSh Federal fuqarolik aviatsiyasi boshqarmasi qonunchilikka tegishli o‘zgartirishlarni faqatgina keyingi yilda kiritishni rejalashtirmoqda.

Ko‘pchilikni dronlarning xususiy shaxslar tomonidan nazoratsiz ishlatilishi xavotirlantirmoqda. Dronlar bir necha bor samolyotlarning falokatiga sabab bo‘lishiga bir bahya qoldi. Kaliforniya shtatida bo‘lib o‘tayotgan NASA UTM Convention anjumanida Amazon kompaniyasi dronlardan jadal sur'atlarda foydalanishga qaramasdan ularning parvozi xavfsizligini tegishlicha ta'minlashga imkon beradigan takliflarni bildirdi.

Kompaniya dronlar uchun 61-122 metr (200-400 fut) balandlikdagi havo hududining bir qismini ajratishni taklif qilmoqda. Havo koridorining ustidagi 30 metr (100 fut) balandlikdagi hudud samolyot bilan dronlarning to‘qnashib ketishlari holatlarini istisno qilish maqsadida parvozlardan xoli bufer zona sifatida e'lon qilinishi taklif qilinmoqda.

O‘z navbatida, koridor tez uchuvchi va sekin uchuvchi dronlarning alohida harakatlanishi uchun ikki qismga bo‘linadi.

Bu o‘zgarishlar dronlarga ega xususiy shaxslarning noroziligini keltirib chiqarishi aniq, chunki ularning dronlariga havo koridorining pastki qismida harakatlanishga ruxsat beriladi, vaholanki hozirda ularga dronlarni 400 futgacha balandlikkacha uchirishga ruxsat berilgan.

Top