Ucell aloqa operatori ham 1 avgust kuni qo‘shimcha xizmatlarda bo‘ladigan uzilish haqida e'lon qildi

1 avgust kuni 08:30 dan 13:30 ga qadar Ucell kompaniyasi o‘zining qo‘shimcha xizmatlarini vaqtinchalik o‘chiradi. Bu haqda kompaniya rasmiy sayti xabar tarqatdi.

«O‘zbekiston Respublikasi telekommunikatsiya tarmoqlarida olib boriladigan profilaktika munosabati bilan 2015 yil 1 avgust kuni soat 08:30 dan 13:30 gacha qo‘shimcha xizmatlar (SMS, MMS, WAP va GPRS) to‘xtatiladi. Ovozli qo‘ng‘iroqlar odatiy ravishda ish faoliyatini davom ettiradi», deyiladi xabarda.

Eslatib o‘tamiz, oldinroq «Bilayn» kompaniyasi qo‘shimcha xizmatlardagi vaqtinchalik uzilishlar haqida xabar bergandi.

Ma'lumot o‘rnida ta'kidlab o‘tish joiz, 1 avgust kuni O‘zbekistondagi barcha oliy o‘quv yurtlariga kirish uchun test imtihonlari bo‘lib o‘tadi.