XXR rahbari Pekin shahrini Olimpiada-2022 mezbonligi bilan qutladi

Xitoy Xalq Respublikasi raisi Si Tszinpin Xitoy delegatsiyasini 2022 yilgi Olimpiya o‘yinlari mezbonligini qo‘lga kiritilgani bilan muborakbod etdi. Bu haqda O‘zbekiston Milliy Olimpiya qo‘mitasi matbuot xizmati xabar qildi.

“Sizlar ushbu jarayonda ulkan ishni amalga oshirdinglar. Umid qilamanki, Xitoy xalqining qo‘llab-quvvatlashi orqali, bo‘lajak Olimpiya o‘yinlarini fantastik darajada o‘tkazish yo‘lida ham samarali mehnat qilishda davom etasizlar – deydi o‘z tabrik maktubida Si Tszinpin.

2022 yilgi qishki Olimpiya o‘yinlari Pekin shahrida o‘tkazilishi e'lon qilingach, butun Xitoy ahli hushxabarni nishonlay boshladi. Ovoz berish jarayonini to‘g‘ridan-to‘g‘ri olib borgan SSTV boshlovchisi, Xitoy delegatsiyasining barcha a'zolari kabi quvonch ko‘z yoshlarini tiya olmadi.

Pekin shahridan 70 chaqirim uzoqlikda joylashgan Buyuk Xitoy devorining “Badalin” hududida ajdarholar raqsi boshlanib ketdi. Ushbu tarixiy voqeilik Pekin shahrida Olimpiya parkida, shuningdek, Pekin shahridan 200 km uzoqlikda joylashgan Chjantszyakou shahrida ham keng tantana qilinmoqda.

2022 yilgi qishki Olimpiada o‘yinlari fevral oyida o‘tkaziladi. Ma'lumki, xuddi shu paytda Xitoyda yangi yil keng nishonlanadi. Shu bois, Xitoyliklar mazkur Olimpiada o‘yinlarini haqiqiy bayramona ruxda o‘tkazishga va'da berishmoqda.

Jumladan, Pekin shahri meri Van Anshun ham 2022 yilgi qishki Olimpiada o‘yinlari Xitoy poytaxtida o‘tkazilishi e'lon qilinganida quvonchdan ko‘zlariga yosh olgan va barchani milliy an'anaga ko‘ra yangi yilda oilaviy iste'mol qilinadigan xitoy chuchvarasini tatib ko‘rish uchun Pekin shahriga taklif qilgan. Shahar meri, shuningdek, Pekin shahri bildirilgan ishonchni oqlash uchun bor imkoniyatni ishga solajakligini bildirdi.