Gamescom 2015: Microsoft kompaniyasi Xbox One geympadi uchun klaviaturani namoyish qildi

Yaqin kunlargacha o‘yinlarning matnli chatlarida muloqot qilish va internetda qidiruv so‘rovini terish uchun Xbox One foydalanuvchilari virtual klaviaturadan foydalanishga majbur edilar, biroq joriy yilning boshida Microsoft qurilmaga USB-klaviatura ulash imkonini beradigan yangi o‘zgartirishni chiqardi.

Endi kompaniya undan ham uzoqroqqa borishga qaror qildi va Gamescom 2015 ko‘rgazmasi doirasida tugmalarning QWERTY tartibida joylashuviga ega ixcham klaviatura Xbox One Chatpad’ni namoyish qildi. Klaviatura bevosita geympadning kontrollyoriga o‘rnatiladi.

Shunga o‘xshash aksessuar avvalroq Xbox 360 uchun taklif qilingan edi va Microsoft kompaniyasi bu aksessuarni Xbox One sotuvga chiqarilganiga ikki yil o‘tganidan keyin chiqarishga qaror qilgani g‘alatiroq ko‘rinadi.

Xbox One Chatpad’ning tugmalari tagi yorug‘lanib turadi, ulardan ba'zilarini esa dasturlash mumkin, ya'ni ular o‘zlaridan o‘yinlarda ma'lum ketma-ketlikda bosiladigan tugmalarni namoyon qilishlari mumkin. Qurilma dinamiklar ovozini boshqarish uchun alohida tugmalarga va 3,5 mm li audiorazyomga ega.

Xbox One Chatpad klaviaturalari joriy yilning 3 noyabrida sotuvga chiqariladi, biroq unga Xbox’ning rasmiy saytida hozirdanoq 35 dollardan buyurtma berish mumkin.