Myanmadagi suv toshqinlaridan 100dan ziyod kishi halok bo‘ldi

Musson yomg‘irlari keltirib chiqargan keng ko‘lamli suv toshqinlari oqibatida qurbon bo‘lganlar soni 100 nafardan oshdi. “Global new light of Myanmar” hukumat nashrining xabar berishicha, tabiiy ofat tufayli 1 milliondan ziyod kishi aziyat chekmoqda.

Ijtimoiy ta'minot va yordam vazirligi ma'lumotlariga ko‘ra, tabiiy ofatdan mamlakatning qariyb barcha hududlari ziyon ko‘rgan. Biroq g‘arbiy Rakxayn shtati hududida qurbonlar soni eng ko‘p qayd etilgan.

Qariyb bir oydan buyon tinimsiz yog‘ayotgan yomg‘ir tufayli Myanmadagi o‘n minglab uylar suv ostida qolgan. Daryo suvlari yoki sel oqimlari shu vaqtga qadar 3 mingga yaqin maktablarni butkul vayron qilgan yoki vaqtinchalik ishdan chiqargan.

Ayni paytda Janubi Sharqiy Osiyo mamlakatlari Myanmaga dori vositalari, oziq ovqat va zarur buyumlardan iborat insonparvar yuklarni jo‘natmoqda. Shuningdek, mamlakatda suv toshqinlaridan aziyat chekkanlar uchun moddiy yordam to‘plash ishlari ham tashkil etilgan.