Qibraylik tadbirkordan noqonuniy ravishda undirilgan 777 mln. so‘m pul o‘z egasiga qaytarildi

Qibray tumanida faoliyat yurituvchi tadbirkordan noqonuniy ravishda undirilgan 777 million so‘m jarima puli o‘z egasiga qaytarildi. Bu haqda Davlat raqobat qo‘mitasi axborot xizmati xabar tarqatmoqda.

Manbaning yozishicha, 2011 yildan buyon faoliyati yuritib kelayotgan tadbirkor 2014 yilning dekabr oyiga qadar bir necha marotaba «Toshkent viloyat ETK» AJga elektr energiyasini yetkazib berish yuzasidan shartnoma tuzish bo‘yicha murojaat qilgan. Biroq, «Toshkent viloyat ETK» AJning mansabdor shaxslari tomonidan ushbu murojaatlar e'tiborsiz qoldirilgan.

Tadbirkor tomonidan elektr energiyasini yetkazib berish bo‘yicha shartnoma tuzish to‘g‘risidagi 2014 yilda bergan murojaatiga esa «Toshkent viloyat ETK» AJning mansabdor shaxslari tomonidan tadbirkor elektr energiyasidan foydalanish bo‘yicha tegishli shartnoma tuzmasdan faoliyat yuritib kelgan deb, unga noqonuniy ravishda 777 mln. so‘m jarima qo‘llangan va ushbu jarimani undirish yuzasidan sudga murojaat qilgan. Biroq, Qo‘mita tomonidan olib borilgan o‘rganishlarga ko‘ra, tadbirkor elektr energiyasi ta'minoti tarmog‘iga «Toshkent viloyat ETK» AJning ruxsati bilan ulanib, tegishli rusumdagi elektr hisoblagichini o‘rnatgan, hisoblagich esa «Toshkent viloyat ETK» AJning mas'ul shaxslari tomonidan muhrlanib, so‘ngra rasmiylashtirilgani ma'lum bo‘ldi.

«Toshkent viloyat ETK» AJ murojaat yuzasidan sudga to‘liq ma'lumotlar taqdim etilmagan bo‘lsada, sudning birinchi instansiyasiga ko‘ra tadbirkordan 777 mln. so‘m jarima «Toshkent viloyat ETK» AJning foydasiga undirish bo‘yicha qaror qabul qilingan. Qo‘mita o‘rganish natijalari va tadbirkor tomonidan taqdim etilgan qo‘shimcha xujjatlar asosida sudga uchinchi shaxs sifatida appelyatsiya shikoyati kiritildi.

Natijada, sudning 777 mln. so‘m jarimani undirish to‘g‘risidagi birinchi instansiyasida qabul qilingan qarori bekor qilindi va tadbirkorning poymol etilgan huquqi tiklandi.