Davlat sanitariya epidemiologiya nazorat xizmati modernizatsiya qilinadi

O‘zbekiston Respublikasi Sog‘liqni saqlash vazirligi ma'lumotlariga ko‘ra, Islom taraqqiyot banki (ITB) O‘zbekiston Respublikasi hukumatiga Davlat sanitariya epidemiologiya nazorat xizmatini modernizatsiya qilish uchun 17,4 mln dollar ajratdi.

ITB mablag‘lari mamlakatdagi mavjud 157 ta davlat sanitar-gigiyenik laboratoriyani modernizatsiya qilish uchun zarur qurilmalarni sotib olishga yo‘naltiriladi.

2015 yil 26 iyunda qabul qilingan “Respublika sanitariya-epidemiologiya xizmati faoliyatini va uni malakali kadrlar bilan ta'minlash tizimini yanada takomillashtirish chora-tadbirlari to‘g‘risida"gi O‘zbekiston Respublikasi Vazirlar Mahkamasi qarorida ham aholining sanitariya-epidemiologik holatini yaxshilash bo‘yicha chora-tadbirlar belgilangan edi.

Unda qayd etilganidek, ayni paytda Davlat sanitariya epidemiologiya nazorat markazlarining zamonaviy uskunalar bilan ta'minlanishi 60-70 foizni, shifokor-kadrlar bilan ta'minlanishi esa 84,4 foizni tashkil etadi.

Bundan avvalroq esa O‘zbekiston hukumatining 2015 yil 31 iyuldagi qarori asosida Sog‘liqni saqlash vazirligi rahbarligi ostida 2015-2016 yillarda respublikada xalqaro tibbiy-sanitar qoidalar joriy etilishi xabar qilingan edi. Xalqaro tibbiy-sanitar qoidalar xalqaro hamjamiyatga kasalliklarning global miqyosda tarqalishiga qarshi javob choralarini ko‘rish va ularni to‘xtatishida ko‘mak ko‘rsatadi.