Davlat tashkilotlari yuridik xizmatiga birinchi marta ishga kirgan shaxslar adliya organlarida stajirovka o‘tashi belgilandi

2015 yil 6 avgust kuni O‘zbekiston Respublikasi Adliya vazirining «Davlat va xo‘jalik boshqaruvi organlari, mahalliy davlat hokimiyati organlari hamda boshqa davlat tashkilotlari yuridik xizmatlari xodimlarining adliya organlarida stajirovka o‘tash tartibi to‘g‘risidagi nizomni tasdiqlash haqida»gi buyrug‘i imzolandi. Bu haqda «Xushnudbek.uz» sayti xabar yozgan.

Mazkur buyruq asosida tasdiqlangan Nizom davlat tashkilotlari yuridik xizmatlari xodimlarining adliya organlarida stajirovka o‘tash tartibini belgilaydi.
Unga ko‘ra, endilikda yuridik xizmat xodimi lavozimiga birinchi marta tayinlangan shaxs adliya organlarida stajirovka o‘taydi.

Tashkilot rahbari yuridik xizmat xodimi lavozimiga birinchi marta tayinlangan shaxsni stajirovkadan o‘tkazishni so‘rab u lavozimga tayinlagan kundan e'tiboran o‘n kun ichida tegishli adliya organiga murojaat etishi lozim.

Adliya organi murojaat kelib tushgandan so‘ng uni ko‘rib chiqib, ikki oy ichida stajirovka o‘tashni tashkil qilishi va uni o‘tash bo‘yicha aniq muddatni ko‘rsatgan holda tashkilot rahbarini stajirovka boshlanishidan kamida bir hafta oldin yozma ravishda xabardor qilishi kerak.

Stajirovka o‘tash muddati ikki haftani tashkil etadi.

Stajirovkani o‘tashdan ozod qilishga yo‘l qo‘yilmaydi.

Stajyorga metodik yordam ko‘rsatish hamda uning amaliy ko‘nikmalarini shakllantirish uchun adliya organlarining malakali va tajribali mutaxassislari orasidan stajirovka rahbari tayinlanadi.

Stajirovka rahbari etib stajyorga yaqin qarindosh hisoblangan shaxslar tayinlanishiga yo‘l qo‘yilmaydi.

Stajirovka rahbari kamida ikki yillik ish stajiga ega bo‘lishi kerak.

Stajirovka muddati tugaganidan keyin stajirovka rahbari tomonidan stajyorga nisbatan tavsifnoma tuziladi va unda stajyorning stajirovka o‘tash rejasida nazarda tutilgan tadbirlarni qanchalik o‘zlashtirganligi, tartib-intizomi, stajirovka davomida u tomonidan egallab olingan kasbiy bilim va amaliy ko‘nikmalar aks ettiriladi va stajyorni yuborgan tashkilotga jo‘natiladi.